საბანკო სექტორი: კომერციული ბანკების მიერ გაცემული სესხები წლიურად 15.5%-ით გაიზარდა 2025 წლის ივნისში წინა თვის 14.7%-იანი ზრდის შემდეგ და საკრედიტო პორტფელმა 66.2 მლრდ ლარი (24.3 მლრდ აშშ დოლარი) შეადგინა. ამასთან, გაცვლითი კურსის ეფექტის გამორიცხვით, ივნისში სესხების პორტფელის წლიურმა ზრდამ 15.6% შეადგინა (+2.1% თ/თ). სექტორების მიხედვით, იურიდიული პირების დაკრედიტება კურსის ეფექტის გამორიცხვით წლიურად 16.5%-ით გაიზარდა, ხოლო საცალო დაკრედიტების წლიური ზრდა 14.7% იყო; 2025 წლის ივნისში სესხების დოლარიზაცია წინა თვესთან შედარებით მცირედით გაიზარდა და 43.1% შეადგინა (+0.21პპ თ/თ და -2.09პპ წ/წ). 
2025 წლის ივნისში საბანკო სექტორში განთავსებული დეპოზიტები წლიურად 11.6%-ით გაიზარდა (კურსის ეფექტის გამორიცხვით) 60.8 მლრდ ლარამდე (22.3 მლრდ აშშ დოლარი), წინა თვეში დაფიქსირებული 11.9%-იანი წლიური ზრდის შემდეგ. ვალუტების მიხედვით, ივნისში ლარის დეპოზიტები წლიურად 9.5%-ით გაიზარდა (+9.1% წინა თვეში), ხოლო უცხოური ვალუტის დეპოზიტების წლიური ზრდა 13.7% იყო (+14.9% წინა თვეში). ამასთან, ივნისში დეპოზიტების დოლარიზაცია წინა თვესთან შედარებით -1.10პპ-ით 49.7%-მდე შემცირდა, თუმცა წლიურად ის კვლავ გაზრდილი რჩება (+0.61პპ წ/წ).

სავალუტო ინტერვენციები: 2025 წლის ივნისში ლარის განგრძობითი გამყარების ფონზე ეროვნულმა ბანკმა გააგრძელა რეზერვების დაგროვება და სავალუტო ბაზარზე 266.0 მლნ აშშ დოლარი შეიძინა.
ჯამურად, 2025 წლის იანვარ-ივნისში სებ-ის სავალუტო შესყიდვებმა 879.5 მლნ აშშ დოლარი შეადგინა.

საგარეო ვაჭრობა: საქსტატის წინასწარი მონაცემებით, 2025 წლის ივნისში საქონლის ექსპორტი წლიურად 10.4%-ით გაიზარდა და 640.2 მლნ აშშ დოლარი შეადგინა, წინა თვეში დაფიქსირებული წლიური 15.7%-იანი ზრდის შემდეგ. ასევე, საქონლის იმპორტი წლიურად 0.9%-ით გაიზარდა 1.4 მლრდ აშშ დოლარამდე, წინა თვის 1.8%-იანი კლების შემდეგ. შედეგად, ივნისში სავაჭრო დეფიციტი წლიურად 6.2%-ით შემცირდა 732.8 მლნ აშშ დოლარამდე.
2025 წლის ივნისში მანქანები (+24.8% წ/წ), ძვირფასი ლითონები (+33.9% წ/წ), ხილი (+32.7% წ/წ), სპირტიანი სასმელები (-11.9% წ/წ) და ღვინო (+50.1% წ/წ), იყო ტოპ-5 ექსპორტირებული საქონელი. ამასთან, ექსპორტის 10.8% ევროკავშირზე მოდიოდა (+31.3% წ/წ), 69.6% დსთ-ზე (+17.5% წ/წ) და 19.6% სხვა ქვეყნებზე (-15.2% წ/წ).
2025 წლის ივნისში ტოპ-5 იმპორტირებული საქონელი იყო მანქანები (-28.1% წ/წ), ნავთობი (-9.9% წ/წ), მედიკამენტები (+17.9% წ/წ), ტელეფონები (+40.3% y/y) წ/წ) და გამომთვლელი მანქანები (-15.3% წ/წ).
ჯამურად, 2025 წლის იანვარ-ივნისში, სავაჭრო დეფიციტი წლიურად 11.6%-ით გაიზარდა და 5.5 მლრდ აშშ დოლარი შეადგინა, რადგან ექსპორტი 13.7%-ით გაიზარდა 3.2 მლრდ აშშ დოლარამდე, ხოლო იმპორტი 12.4%-ით გაიზარდა და 8.7 მლრდ აშშ დოლარს გაუტოლდა. ამასთან, სურათების/ნახატების ერთჯერადი იმპორტის გამორიცხვით, მთლიანი იმპორტი წლიურად 6.2%-ით, ხოლო სავაჭრო დეფიციტი წლიურად 1.8%-ით გაიზარდა 2025 წლის იანვარ-ივნისში.

მწარმოებელთა ფასების ინდექსი: საქსტატის მონაცემებით, მწარმოებელთა ფასების ინდექსი წლიურად 3.0%-ით გაიზარდა 2025 წლის ივნისში, წინა თვეში არსებული 4.9%-იანი ზრდის შემდეგ. მწარმოებელთა ფასების წლიურ ზრდაზე ძირითადი ზეგავლენა იქონია ფასების ზრდამ დამამუშავებელი მრეწველობის (+1.6%), სამთომოპოვებითი მრეწველობის (+13.8%) და ელექტროენერგიის მიწოდების (+8.3%) სექციებში.