ბათუმში უძრავ ქონებაზე მოთხოვნას ძირითადად უცხოელების საინვესტიციო შენაძენები ქმნის. შედეგად, საბინაო ფონდის ზრდას სწორედ საინვესტიციო აპარტამენტები განაპირობებს, რომლებიც ძირითადად ზღვის მახლობლად მდებარეობს, ხოლო საცხოვრებელი პროექტები კონცენტრირებულია ქალაქის სიღრმეში. ადგილმდებარეობის, ინფრასტრუქტურის, ფასების კატეგორიისა და მყიდველთა გეოგრაფიის განსხვავებები დიდწილად განსაზღვრავს რა კეტეგორიისაა პროექტი – საინვესტიციო თუ საცხოვრებელი.
საცხოვრებელი უძრავი ქონება
ძირითადი სეგმენტი ბათუმის ადგილობრივი მაცხოვრებლები და მიგრანტები არიან. მიუხედავად იმისა, რომ საცხოვრებელი ბაზარი მოთხოვნა-მიწოდების კუთხით დაბალანსებულია, თითქმის ყველა მშენებარე პროექტი თავს იყრის ბიუჯეტურ და საშუალო საფასო სეგმენტებში. მაღალი კლასის საცხოვრებელი პროექტების სიმცირე კი იწვევს არჩევანის დეფიციტს იმ მაღალი შემოსავლის მქონე მაცხოვრებლებისთვის, რომლებსაც საცხოვრებელი პირობების გაუმჯობესების სურვილი აქვთ.
საინვესტიციო უძრავი ქონება
მიმდინარე მშენებლობების უდიდესი წილი კონცენტრირებულია საინვესტიციო პროექტებში, რომლებიც ძირითადად შედგება საშუალო საფასო სეგმენტის (1,500–2,500 აშშ დოლარი კვადრატულ მეტრზე) სტუდიოს ტიპის აპარტამენტებისგან. გალტ ენდ თაგარტის შეფასებით, მოკლევადიანი გაქირავების აპარტამენტების რაოდენობა 2029 წლისთვის გაორმაგდება, რაც უარყოფითად აისახება ქირის ამონაგებზე, თუ ტურისტული ნაკადები/საშუალო დარჩენის ხანგრძლივობა ასევე სწრაფი ტემპით არ გაიზრდება.
მყიდველების პროფილები
გალტ ენდ თაგარტის სისტემური დეველოპერების გამოკითხვის თანახმად, ბათუმში ბინების გაყიდვების დაახლოებით სამი მეოთხედი უცხოელ მყიდველებზე მოდის. ყველაზე დიდი მოთხოვნა ფიქსირდება უკრაინიდან, რუსეთიდან, ბელარუსიდან, ისრაელიდან და ევროპის ქვეყნებიდან, მაშინ როცა თურქეთი, არაბული სახელმწიფოები და ცენტრალური აზიის ქვეყნები მზარდ ბაზრებს წარმოადგენენ. უცხოელ ინვესტორებს ბათუმში იზიდავს ქირის მაღალი ამონაგები, ფასების ზრდის მოლოდინი და შედარებით დაბალი საინვესტიციო ღირებულება სხვა საზღვაო კურორტებთან შედარებით.
მიმდინარე ტენდენციები
პირველად ბაზარზე, 2022–23 წლებში რეკორდულად მაღალი აქტივობის შემდეგ, მოთხოვნა 2024 წელს შემცირდა, ხოლო გასაყიდი ბინების რაოდენობა მაღალ დონეზე შენარჩუნდა. მიუხედავად იმისა, რომ 2025 წელს შეიმჩნევა მცირედი გაუმჯობესება, მოთხოვნა ჯერ კიდევ მნიშვნელოვნად ჩამორჩება წინა წლების მაჩვენებლებს, რაც ზრდის ჭარბი მიწოდების რისკებს და არსებულ ფასების ზრდის ტემპს არამდგრადს ხდის.
მეორად ბაზარზე, ბოლო წლებში ბათუმის საბინაო ფონდის გაფართოებამ ამ ბაზრის აქტივობა მნიშვნელოვნად გაზარდა. 2025 წელს მოთხოვნის მატება ფასების ზრდაში აისახა.
