საბანკო სექტორი: კომერციული ბანკების მიერ გაცემული სესხები წლიურად 19.9%-ით გაიზარდა 2024 წლის მარტში, წინა თვის 17.5%-იანი ზრდის შემდეგ და საკრედიტო პორტფელმა 53.8 მლრდ ლარი შეადგინა. ამასთან, გაცვლითი კურსის ეფექტის გამორიცხვით, თებერვალში სესხების პორტფელის წლიურმა ზრდამ 17.3% შეადგინა. სექტორების მიხედვით, კორპორატიული დაკრედიტება კურსის ეფექტის გამორიცხვით წლიურად 20.7%-ით გაიზარდა, ხოლო საცალო დაკრედიტების წლიური ზრდა 14.6% იყო; 2024 წლის მარტში სესხების დოლარიზაცია, მცირედით, 44.8%-მდე გაიზარდა (+0.26პპ წ/წ და +0.55პპ თ/თ).
2024 წლის მარტში საბანკო სექტორში განთავსებული დეპოზიტები წლიურად 16.7%-ით გაიზარდა (კურსის ეფექტის გამორიცხვით) 51.8 მლრდ ლარამდე, წინა თვეში დაფიქსირებული 14.8%-იანი წლიური ზრდის შემდეგ. ვალუტების მიხედვით, მარტში ლარის დეპოზიტები წლიურად 29.5%-ით (+28.4% წინა თვეში) გაიზარდა, ხოლო უცხოური ვალუტის დეპოზიტების წლიური ზრდა 5.6% იყო (+3.6% წინა თვეში). შედეგად, მარტში დეპოზიტების დოლარიზაციამ 49.7% შეადგინა (-3.85პპ წ/წ და -0.17პპ თ/თ).
ეროვნულმა ბანკმა მარტში რეზერვები შეავსო
სებ-მა 2024 წლის მარტში 127.9 მლნ აშშ დოლარი შეისყიდა BMatch პლატფორმის საშუალებით. ჯამურად, 2024 წლის I კვარტალში, სებ-ის წმინდა შესყიდვამ 213.5 მლნ აშშ დოლარი შეადგინა.
ტურიზმი: 2024 წლის I კვარტალში საერთაშორისო ვიზიტორები (ჯამურად ტურისტული და ერთდღიანი ვიზიტები) საქართველოში წლიურად 8.6%-ით გაიზარდა და 1.16 მლნ მოგზაური შეადგინა. ამასთან, ტურისტული ვიზიტები წლიურად 11.0%-ით გაიზარდა, ხოლო ერთდღიანი ვიზიტორების წლიურად 0.7%-ით შემცირდა. ყველაზე მეტი ვიზიტორი შემოვიდა თურქეთიდან (22.0% წილი ჯამურ ვიზიტებში), რასაც მოჰყვება რუსეთი (18.6% წილი) და სომხეთი (16.6% წილი). ვიზიტორთა უმრავლესობა საქართველოში შემოვიდა საავტომობილო ტრანსპორტით (60.5%-იანი წილი), რასაც მოსდევს საჰაერო გზით შემოსვლა (38.7%-იანი წილი).
