ეკონომიკური ზრდა: საქსტატის წინასწარი მონაცემებით, 2023 წლის ნოემბერში საქართველოს ეკონომიკა 5.9%-ით გაიზარდა, წინა თვეში დაფიქსირებული 6.2%-იანი ზრდის შემდეგ. ჯამურად, 2023 წლის იანვარ-ნოემბერში საქართველოს ეკონომიკა წლიურად 6.9%-ით გაიზარდა, რაც თანხვედრაშია ჩვენს 2023 წლის ეკონომიკური ზრდის 6.8%-იან პროგნოზთან. ნოემბერში ზრდა დაფიქსირდა საფინანსო საქმიანობის, მშენებლობის, პროფესიული საქმიანობის და ვაჭრობის დარგებში. ამასთან, რეალური ზრდა შემცირდა დამამუშავებელი მრეწველობის, ენერგეტიკის და ტრანსპორტის დარგებში. ჩვენი საბაზისო სცენარით, საქართველოს ეკონომიკა 5.4%-ით გაიზრდება 2024 წელს, ხოლო 6.0%-ით ოპტიმისტური სცენარით (იხილეთ დეტალები აქ).
ინფლაცია: 2023 წლის დეკემბერში წლიური ინფლაცია 0.4% იყო, ხოლო საშუალო წლიურმა ინფლაციამ 2.5% შეადგინა 2023 წელს. დეკემბერში ინფლაციის დაბალ დონეზე შენარჩუნება ძირითადად სურსათის ფასების წლიურმა 3.1%-იანმა კლებამ განაპირობა. ამასთან, დეკემბერში საბაზო ინფლაციამ, რომელიც კალათიდან გამორიცხავს სურსათის, ენერგომატარებლების და თამბაქოს ფასებს, 1.9% შეადგინა, ხოლო ადგილობრივად წარმოებული პროდუქციის ფასების ზრდის ტემპი 3.6%-მდე შენელდა ნოემბერში დაფიქსირებული 3.8%-დან. 2023 წლის დეკემბერში წლიური ინფლაციის ფორმირებაზე მნიშვნელოვანი გავლენა იქონია ფასების ცვლილებამ შემდეგ ჯგუფებში: სურსათი და უალკოჰოლო სასმელები (-2.7% წ/წ, -0.92პპ), ჯანდაცვა (-3.8% წ/წ, -0.37პპ), ტრანსპორტი (+5.1% წ/წ, +0.65პპ), ალკოჰოლური სასმელები, თამბაქო (+3.4%, +0.24პპ) და საცხოვრებელი, წყალი, ელ. ენერგია, აირი (+2.3%, +0.24პპ).
ჩვენი პროგნოზით, 2024 წელს საშუალო წლიური ინფლაცია 3.5%-ის დონეზეა მოსალოდნელი.
მიმდინარე ანგარიში: 2023 წლის იანვარ-სექტემბერში მიმდინარე ანგარიშის დეფიციტმა მშპ-ის 2.6% შეადგინა, რაც შემცირებულია გასული წლის ანალოგიურ პერიოდში არსებული მშპ-ის 3.2%-იანი დონიდან. მიმდინარე ანგარიშის დეფიციტის შემცირება ძირითადად ტურიზმიდან მიღებული შემოსავლებისა (+29.2% წ/წ) და IT მომსახურების ექსპორტის (+87.0% წ/წ) ზრდამ განაპირობა. დეფიციტი შემცირებაზე ასევე პოზიტიურად მოქმედებდა ტრანსფერტების ბალანსის წლიური 6.4%-იანი ზრდა. აღსანიშნავია, რომ პირდაპირი უცხოური ინვესტიციები (მშპ-ის 5.2%) მიმდინარე ანგარიშის დეფიციტის დაფინანსების ძირითად წყაროს წარმოადგენდა. ჩვენი პროგნოზით, მიმდინარე ანგარიშის დეფიციტი მშპ-ის 4.3%-ის დონეზეა მოსალოდნელი 2024 წელს, რაც გაუმჯობესებაა 2023 წლის მოსალოდნელი 4.5%-დან.
საბანკო სექტორი: კომერციული ბანკების მიერ გაცემული სესხები წლიურად 17.3%-ით გაიზარდა 2023 წლის ნოემბერში წინა თვის 15.9%-იანი ზრდის შემდეგ და საკრედიტო პორტფელმა 51.2 მლრდ ლარი შეადგინა. ამასთან, გაცვლითი კურსის ეფექტის გამორიცხვით, ნოემბერში სესხების პორტფელის წლიურმა ზრდამ 16.3% შეადგინა (+16.1% ოქტომბერში). სექტორების მიხედვით, კორპორატიული დაკრედიტების წლიურმა ზრდამ, წინა თვის მსგავსად, 19.3% შეადგინა, ხოლო საცალო დაკრედიტება წლიურად 13.7%-ით გაიზარდა (+13.4% ოქტომბერში); 2023 წლის ნოემბერში სესხების დოლარიზაციამ 45.5% შეადგინა (+0.63პპ წ/წ და +0.30პპ თ/თ).
2023 წლის ნოემბერში საბანკო სექტორში განთავსებული დეპოზიტები წლიურად 17.8%-ით გაიზარდა (კურსის ეფექტის გამორიცხვით) 50.4 მლრდ ლარამდე. ვალუტების მიხედვით, ნოემბერში ლარის დეპოზიტები წლიურად 34.6%-ით (+36.9% ოქტომბერში), ხოლო უცხოური ვალუტის დეპოზიტები წლიურად 4.9%-ით გაიზარდა (+5.1% ოქტომბერში). შედეგად, ნოემბერში დეპოზიტების დოლარიზაციამ 50.8% შეადგინა (-5.97პპ წ/წ და +0.42პპ თ/თ).
