საერთაშორისო რეზერვები: საქართველოს ეროვნული ბანკის თანახმად, 2023 წლის დეკემბერში ოფიციალური საერთაშორისო რეზერვები წლიურად 2.1%-ით გაიზარდა და 5.0 მლრდ აშშ დოლარი შეადგინა. ამასთან, წინა თვესთან შედარებით რეზერვები 2.3%-ით შემცირდა (-118.7 მლნ აშშ დოლარი). რეზერვების ცვლილება ძირითადად უკავშირდება უცხოური ვალუტის მოკლევადიან ვალდებულებებზე სარეზერვო ნორმის ზედა ზღვრის 25%-დან 20%-მდე შემცირებას, ასევე მთავრობისა და საბანკო სექტორის სავალუტო ოპერაციებს.
ტურიზმის შემოსავლები: ჩვენი შეფასებით, 2023 წლის დეკემბერში ტურიზმიდან მიღებული შემოსავლები 330 მლნ აშშ დოლარს გაუტოლდა (+21.0% წ/წ მიგრაციის ეფექტის გამორიცხვით). ჯამურად, 2023 წელს ტურიზმის შემოსავლებმა 4.2 მლრდ აშშ დოლარი შეადგინა (+19.2% წ/წ). ჩვენი პროგნოზით, 2024 წელს ტურიზმის შესავლები 4.5 მლრდ აშშ დოლარს (+7.0% წ/წ) მიაღწევს, რაც ითვალისწინებს საერთაშორისო ვიზიტორების სრულად აღდგენას პანდემიამდელ დონესთან შედარებით.
საკრედიტო რეიტინგი: 2024 წლის 12 იანვარს Fitch-მა საქართველოს სუვერენული საკრედიტო რეიტინგი BB დონეზე დატოვა პოზიტიური პერსპექტივით. Fitch-ის მიხედვით რეიტინგს განაპირობებს საქართველოს მმართველობის და ეკონომიკური განვითარების ძლიერი მაჩვენებლები, მისი სანდო მაკროეკონომიკური და ფისკალური პოლიტიკის ჩარჩო, სახელმწიფო ვალის ზომიერი დონე და ჯანსაღი საბანკო სექტორი. Fitch-ის პროგნოზით, საქართველოს ეკონომიკა 5.0%-ით გაიზრდება 2024 წელს და 5.1%-ით 2025 წელს.
