ტურიზმი: 2024 წლის მე-4 კვარტალში საერთაშორისო ვიზიტორები (ჯამურად ტურისტული და ერთდღიანი ვიზიტები) საქართველოში წლიურად 4.6%-ით გაიზარდა და 1.4 მლნ მოგზაური შეადგინა. აღნიშნული ზრდა ძირითადად ტურისტული ვიზიტების 9.0%-იანმა ზრდამ განაპირობა (78.9% მთლიან ვიზიტებში), მაშინ როცა ერთდღიანი ვიზიტები წლიურად 9.2%-ით შემცირდა. ამასთან, 2024 წლის მე-4 კვარტალში ყველაზე მეტი ვიზიტორი შემოვიდა რუსეთიდან (22.0% წილი ჯამურ ვიზიტებში), თურქეთიდან (19.6% წილი) და სომხეთიდან (15.3% წილი). ვიზიტორთა უმრავლესობა საქართველოში შემოვიდა საავტომობილო ტრანსპორტით (59.1%-იანი წილი), რასაც მოსდევს საჰაერო გზით შემოსვლა (40.2%-იანი წილი). ჯამურად, 2024 წელს საქართველომ 6.5 მლნ მოგზაურს უმასპინძლა, საიდანაც ტურისტული ვიზიტები 5.1 მლნ იყო, რაც მცირედით, 0.2%-ით აღემატება 2019 წლის მაჩვენებელს. ერთდღიანმა ვიზიტებმა კი 2024 წელს პანდემიამდელი დონის მხოლოდ 51.6% შეადგინა. შედეგად, ჩვენი შეფასებით, ტურიზმიდან მიღებული შემოსავლები 4.4 მლრდ აშშ დოლარს გაუტოლდა 2024 წელს (2023 წელს ტურიზმის შემოსავლები 4.1 მლრდ აშშ დოლარს შეადგენდა).

საგარეო ვაჭრობა: საქსტატის მონაცემებით, 2024 წლის დეკემბერში საქონლის ექსპორტი წლიურად 6.8%-ით გაიზარდა და 549.4 მლნ აშშ დოლარი შეადგინა, წინა თვეში დაფიქსირებული წლიური 12.6%-იანი ზრდის შემდეგ. ამასთან, იმპორტი წლიურად 20.5%-ით გაიზარდა 1.7 მლრდ აშშ დოლარამდე, წინა თვის 14.2%-იანი ზრდის შემდეგ. შედეგად, დეკემბერში სავაჭრო დეფიციტი წლიურად 28.8%-ით გაიზარდა 1.1 მლრდ აშშ დოლარამდე.

ჯამურად, 2024 წელს, სავაჭრო დეფიციტი წლიურად 8.3%-ით გაიზარდა და რეკორდული მაჩვენებელი 10.3 მლრდ აშშ დოლარი შეადგინა, რადგან ექსპორტი 7.8%-ით გაიზარდა რეკორდულ 6.6 მლრდ აშშ დოლარამდე, ხოლო იმპორტი 8.1%-ით გაიზარდა და ასევე რეკორდულ დონეს 16.9 მლრდ აშშ დოლარს გაუტოლდა.

ფულადი გზავნილები: სებ-ის მიხედვით, 2024 წლის დეკემბერში ფულადი გზავნილები წლიურად 8.2%-ით შემცირდა 285.4 მლნ აშშ დოლარამდე, წინა თვეში დაფიქსირებული წლიური 9.6%-იანი კლების შემდეგ. ძირითადი დონორი ქვეყნებიდან ფულადი გზავნილების წლიური ზრდა დაფიქსირდა ევროკავშირიდან (+4.3%, მთლიანის 46.5%), აშშ-დან (+18.4%, მთლიანის 19.4%), ისრაელიდან (+11.1%, მთლიანის 8.2%) და თურქეთიდან (+11.8%, მთლიანის 3.2%). ამასთან, ფულადი გზავნილები წლიურად შემცირდა რუსეთიდან (-55.8%, მთლიანის 11.0%) და ყაზახეთიდან (-50.3%, მთლიანის 2.6%).

ჯამურად, 2024 წელს ფულადი გზავნილები წლიურად 18.9%-ით შემცირდა და 3.4 მლრდ აშშ დოლარი შეადგინა.