ინფლაცია: 2025 წლის იანვარში წლიური ინფლაცია 2.0%-მდე გაიზარდა, წინა თვეში დაფიქსირებული 1.9%-იანი ინფლაციის შემდეგ. იანვრის ინფლაცია ძირითადად განაპირობა ადგილობრივი ინფლაციის წლიურმა 2.3%-იანმა ზრდამ (+2.2% წ/წ წინა თვეში), რომელსაც მოჰყვება შერეული საქონლის ფასების წლიური 3.5%-იანი ზრდა (+3.9% წ/წ წინა თვეში). ამასთან, იმპორტირებული ინფლაცია წინა თვეების მსგავსად უარყოფითი იყო (-0.4% წ/წ იანვარში vs. -0.9% წ/წ წინა თვეში). რაც შეეხება საბაზო ინფლაციას, რომელიც კალათიდან გამორიცხავს სურსათის, ენერგომატარებლების და თამბაქოს ფასებს, იანვარში 2.0%-მდე შენელდა წინა თვის 2.3%-იანი დონიდან.
სასაქონლო ჯგუფების მიხედვით, 2025 წლის იანვარში წლიური ინფლაციის ფორმირებაზე მნიშვნელოვანი გავლენა იქონია ფასების ცვლილებამ შემდეგ ჯგუფებში: სურსათი და უალკოჰოლო სასმელები (+3.0% წ/წ, +1.03პპ), ალკოჰოლური სასმელები, თამბაქო (+6.2%, +0.41პპ), ჯანდაცვა (+3.8% წ/წ, +0.34პპ), განათლება (+5.1% წ/წ, +0.26პპ), სასტუმროები და რესტორნები (+6.8%, +0.23პპ), ტრანსპორტი (-1.0% წ/წ, -0.12პპ) და კავშირგაბმულობა (-12.5% წ/წ, -0.46პპ).
ამასთან, თვიურ ჭრილში 2025 წლის იანვარში 0.4%-იანი ინფლაცია დაფიქსირდა, რომელიც ძირითადად სურსათი და უალკოჰოლო სასმელების (+1.1% თ/თ, +0.40პპ) ჯგუფში ფასების ზრდამ განაპირობა.
ჩვენი პროგნოზით, 2025 წელს საშუალო წლიური ინფლაცია 3.9%-ის დონეზეა მოსალოდნელი.
ტურიზმის შემოსავლები: ჩვენი შეფასებით, 2025 წლის იანვარში ტურიზმიდან მიღებული შემოსავლები წლიურად 1.4%-ით გაიზარდა და 290 მლნ აშშ დოლარი შეადგინა.
ჩვენი პროგნოზით, ტურიზმიდან მიღებული შემოსავლები 4.5 მლრდ აშშ დოლარს მიაღწევს 2025 წელს.
საერთაშორისო რეზერვები: საქართველოს ეროვნული ბანკის თანახმად, 2025 წლის იანვარში ოფიციალური საერთაშორისო რეზერვები წლიურად 8.7%-ით შემცირდა და 4.4 მლრდ აშშ დოლარი შეადგინა. ამასთან, იანვარში წინა თვესთან შედარებით რეზერვები 0.4%-ით შემცირდა (-18.5 მლნ აშშ დოლარი). რეზერვების ცვლილება უკავშირდება მთავრობის და/ან საბანკო სექტორის სავალუტო ოპერაციებს, ასევე, სავარაუდოდ, სებ-ის მიერ უცხოური ვალუტის ყიდვა/გაყიდვას BMatch-ის პლატფორმის გამოყენებით (ინფორმაცია ხელმისაწვდომი იქნება 25 თებერვალს). აღსანიშნავია, რომ 2025 წლის იანვრის მდგომარეობით მონეტარული ოქრო მთლიანი საერთაშორისო რეზერვების 14.4%-ს შეადგენს.
