დეველოპერების გაყიდვები
2025 წლის თებერვალში შერჩეული დეველოპერების პროექტებში (17 სისტემური დეველოპერის გამოკითხვაზე დაყრდნობით) გაყიდული ბინების რაოდენობა წლიურად 11.0%-ით შემცირდა (-13.8% წლიური შემცირება გაყიდულ ფართობში). ამასთან, იმ პროექტებში, რომელთა დასრულებაც 2025 წლის ბოლომდეა მოსალოდნელი, ბინების 78% უკვე გაყიდულია. მნიშვნელოვანია, რომ ამ გაყიდვების დიდი ნაწილი დეველოპერების მიერ შეთავაზებული შიდა განვადების სქემებით განხორციელდა.
მეორადი ბაზარი – რეგისტრირებული ტრანზაქციები
2025 წლის თებერვალში მეორად ბაზარზე 1,527 ბინა გაიყიდა, რაც წლიურად 9.3%-იანი კლებაა. ჯამში, 2025 წლის ორ თვეში მეორად ბაზარზე დარეგისტრირებული ტრანზაქციების რაოდენობამ 2,890 შეადგინა რაც გასული წლის ამავე პერიოდს 12.1%-ით ჩამორჩება.
ფასები
2025 წლის თებერვალში პირველად ბაზარზე კვადრატული მეტრის საშუალო ფასი თვიურად 0.4%-ით გაიზარდა და 1,325 აშშ დოლარი შეადგინა, ხოლო მეორადი ბაზრის ახალ პროექტებში საშუალო ფასი 1,245 აშშ დოლარი იყო რაც 4.4%-იანი თვიური შემცირებაა.
ქირა
თბილისში ქირის ფასები 2024 წელს მეტწილად სტაბილური იყო, კვადრატულ მეტრზე 10 აშშ დოლარის ფარგლებში. 2025 წლის თებერვალში თბილისში საშუალო ზომის ბინის (50-60 მ2) ქირის ფასი თვიურად 1.7%-ით შემცირდა და კვადრატულზე 9.6 აშშ დოლარი შეადგინა. ქირის საშუალო წლიური ამონაგები 8.6% იყო.
სამშენებლო ნებართვები
2025 წლის თებერვალში გაცემული ნებართვების საცხოვრებელი ფართობი წლიურად 26.7%-ით გაიზარდა, დეკემბერსა და იანვარში დაფიქსირებული კლების შემდეგ. თებერვალში ნებართვა გაიცა 18 საცხოვრებელ პროექტზე, რომელთა ჯამური საცხოვრებელი ფართი 108,877 მ2-ს შეადგენს. მიუხედავად თებერვალში დაფიქსირებული ზრდისა, ჯამურად 2025 წლის ორ თვეში გაცემული ნებართვების მოცულობა წლიურად 17.4%-ით არის შემცირებული.
