2025 წლის ივნისში მეორად ბაზარზე გაყიდვებმა ზრდა განაგრძო და წლის ყველაზე მაღალ ნიშნულს მიაღწია, ხოლო გაყიდვები პირველად ბაზარზე, მაისში დაფიქსირებული ზრდის შემდეგ თვიურად შემცირდა. ბაზრებს შორის სხვაობის მიზეზი შესაძლოა ფასთა სხვაობა იყოს, რადგან მყიდველები ფასის მიმართ სავარაუდოდ უფრო მგრძნობიარე გახდნენ. მიწოდების მხარეს, გაცემული ნებართვების მოცულობა ივნისში გაიზარდა, თუმცა 2025 წლის პირველი ნახევრის ჯამური მაჩვენებელი წლიურად მცირე შემცირებას აჩვენებს. ამასთან, ფასები გაიზარდა როგორც პირველად, ასევე მეორად ბაზარზე მაისში დაფიქსირებული კლების შემდეგ.