საერთაშორისო სავალუტო ფონდის განახლებული პროგნოზით, გლობალური ეკონომიკა 3.0%-ით გაიზრდება 2023 წელს და 2.9%-ით 2024 წელს, რაც 2022 წელს დაფიქსირებული 3.5%-იანი ზრდის შემდეგ მნიშვნელოვანი შენელებაა. ეს შენელება ნაწილობრივ გამკაცრებული მონეტარული პოლიტიკის შედეგია, რომლის მიზანი ინფლაციის მოთოკვაა. ამასთან, სავალუტო ფონდი პროგნოზირებს მსოფლიო საშუალო წლიური ინფლაციის 6.9%-მდე შემცირებას 2023 წელს (8.7% იყო 2022 წელს), ხოლო 5.8%-მდე 2024 წელს. სავალუტო ფონდი აღნიშნავს, რომ ინფლაციის მიზნობრივ დონემდე დაბრუნება უმეტეს შემთხვევაში 2025 წლამდე არ არის მოსალოდნელი. საქართველოს ეკონომიკა სავალუტო ფონდის პროგნოზით გაიზრდება 6.2%-ით 2023 წელს და 4.8%-ით 2024 წელს.

საშუალო თვიური ხელფასი: საქსტატის მიხედვით, 2022 წელს საშუალო თვიური ნომინალური ხელფასი წლიურად 18.3%-ით გაიზარდა 1,543 ლარამდე. ამასთან, აღნიშნულ პერიოდში, მედიანური ხელფასი წლიურად 15.6%-ით გაიზარდა (რეალური ზრდა 3.3%-ია) და 1,040 ლარი შეადგინა, რაც 32.6%-ით ნაკლებია საშუალო თვიურ ხელფასთან შედარებით. სექტორების მიხედვით, 2022 წელს ყველაზე მაღალი მედიანური ხელფასი დაფიქსირდა შემდეგ დარგებში: სამთომოპოვებითი მრეწველობა (1,703 ლარი), ინფორმაცია და კომუნიკაცია (1,637 ლარი), სახელმწიფო მმართველობა (1,547 ლარი), მშენებლობა (1,500 ლარი), ელექტროენერგიისა და გაზის მიწოდება (1,425 ლარი) და ფინანსური და სადაზღვევო საქმიანობა (1,413 ლარი). ამასთან, 2022 წელს, ყველაზე დაბალი მედიანური ხელფასი ფიქსირდება განათლების (747 ლარი), ადმინისტრაციული საქმიანობის (750 ლარი) და წყალმომარაგების (770 ლარი) დარგებში.

საგარეო ვაჭრობა: საქსტატის მონაცემებით, 2023 წლის სექტემბერში საქონლის ექსპორტი წლიურად 0.8%-ით გაიზარდა 527.8 მლნ აშშ დოლარამდე, წინა თვის 4.8%-იანი ზრდის შემდეგ. იმპორტი წლიურად 10.0%-ით გაიზარდა და 1.25 მლრდ აშშ დოლარი შეადგინა, წინა თვეში დაფიქსირებული 2.3%-იანი ზრდის შემდეგ. შედეგად, სავაჭრო დეფიციტი წლიურად 17.8%-ით გაიზარდა და 722.4 მლნ აშშ დოლარი შეადგინა, წინა თვის 0.9%-იანი ზრდის შემდეგ. 
ჯამურად, 2023 წლის პირველ 9 თვეში, სავაჭრო დეფიციტი წლიურად 22.5%-ით გაიზარდა და 6.7 მლრდ აშშ დოლარი შეადგინა, რადგან ექსპორტი 12.7%-ით გაიზარდა 4.6 მლრდ აშშ დოლარამდე, ხოლო იმპორტი 18.3%-ით გაიზარდა და 11.3 მლრდ აშშ დოლარი შეადგინა.