ინფლაცია: 2023 წლის აგვისტოში სამომხმარებლო ფასების წლიური ინფლაცია 0.9%-მდე გაიზარდა, წინა თვის 0.3%-იანი დონიდან, რაც იხსნება იმპორტირებული (-5.8% წ/წ) და შერეული საქონლის (-1.9% წ/წ) ინფლაციის წლიური კლების შენელებით წინა თვესთან შედარებით. ამასთან, ადგილობრივი ინფლაციის ზრდის ტემპი კვლავ განაგრძობს შენელებას (+6.1% წ/წ აგვისტოში, ხოლო +7.2% წ/წ ივლისში). რაც შეეხება საბაზო ინფლაციას, რომელიც კალათიდან გამორიცხავს სურსათის, ენერგომატარებლების და თამბაქოს ფასებს, 2019 წლის აგვისტოს შემდეგ პირველად ჩამოცდა 3.0%-იან ნიშნულს და 2.5% (-0.6პპ თ/თ) შეადგინა აგვისტოში. 
2023 წლის აგვისტოში წლიური ინფლაციის ფორმირებაზე მნიშვნელოვანი გავლენა იქონია ფასების ცვლილებამ შემდეგ ჯგუფებში: ტრანსპორტი (-7.9% თ/თ, -0.94პპ), ჯანდაცვა (-7.3% თ/თ, -0.72პპ), სურსათი და უალკოჰოლო სასმელები (+2.4%, +0.76პპ) და საცხოვრებელი, წყალი, ელ. ენერგია, აირი (+5.0%, 0.52პპ). ამასთან, 2023 წლის აგვისტოში წინა თვესთან შედარებით ადგილი ჰქონდა 0.3%-ან ინფლაციას, რაზეც მნიშვნელოვანი გავლენა იქონია ფასების ზრდამ სურსათი და უალკოჰოლო სასმელების (+2.1%, +0.69პპ) და ტრანსპორტის (+1.6% თ/თ, +0.19პპ) კატეგორიებში.

პირდაპირი უცხოური ინვესტიციები: საქსტატის წინასწარი მონაცემებით, 2023 წლის მე-2 კვარტალში საქართველოში განხორციელებული პირდაპირი უცხოური ინვესტიციები 29.9%-ით გაიზარდა და 505.7 მლნ აშშ დოლარი შეადგინა. აღნიშნული ზრდა ძირითადად განაპირობა რეინვესტიციების ზრდამ (+59.1% წ/წ, მთლიანი ინვესტიციების 83.5%), ხოლო სააქციო კაპიტალის კომპონენტში კლება დაფიქსირდა (-23.3% წ/წ). 
2023 წლის მე-2 კვარტალში ყველაზე მეტი პირდაპირი უცხოური ინვესტიცია განხორციელდა შემდეგ სექტორებში: საფინანსო საქმიანობა (255.7 მლნ აშშ დოლარი, +322.9% წ/წ, მთლიანის 50.6%), ელექტროენერგიის მიწოდება (137.2 მლნ აშშ დოლარი, +27.1% წ/წ, მთლიანის 27.1%), მრეწველობა (35.6 მლნ აშშ დოლარი, -26.5% წ/წ, მთლიანის 7.0%) და ვაჭრობა (34.9 მლნ აშშ დოლარი, -60.7% წ/წ, მთლიანის 6.9%).
უმსხვილესი ინვესტორი ქვეყნები იყვნენ დიდი ბრიტანეთი (168.3 მლნ აშშ დოლარი), თურქეთი (71.0 მლნ აშშ დოლარი), ნიდერლანდები (62.7 მლნ აშშ დოლარი) და ჩეხეთი (55.6 მლნ აშშ დოლარი).
ჯამურად, 2023 წლის პირველ ნახევარში საქართველოში განხორციელებული პირდაპირი უცხოური ინვესტიციები წლიურად 10.9%-ით გაიზარდა 1.1 მლრდ აშშ დოლარამდე, რაც მშპ-ის 7.7%-ია.

საერთაშორისო რეზერვები: საქართველოს ეროვნული ბანკის თანახმად, 2023 წლის აგვისტოში ოფიციალური საერთაშორისო რეზერვები წლიურად 27.6%-ით გაიზარდა და 5.4 მლრდ აშშ დოლარი შეადგინა. ამასთან, წინა თვესთან შედარებით რეზერვები, მცირედით, 0.75 მლნ აშშ დოლარით გაიზარდა. რეზერვების ცვლილება უკავშირდება მთავრობის და საბანკო სექტორის სავალუტო ოპერაციებს, ასევე, სავარაუდოდ, სებ-ის მიერ უცხოური ვალუტის შესყიდვას (ინფორმაცია ხელმისაწვდომი იქნება 25 სექტემბერს. 
ტურიზმის შემოსავლები: ჩვენი შეფასებით, 2023 წლის აგვისტოში ტურიზმიდან მიღებული შემოსავლები წლიურად 5.2%-ით გაიზარდა და 550 მლნ აშშ დოლარი შეადგინა. ჯამურად, ჩვენი შეფასებით, 2023 წლის პირველ 8 თვეში ტურიზმის შემოსავლებმა 2.9 მლრდ აშშ დოლარი შეადგინა (+34.7% წ/წ).