მონეტარული პოლიტიკა: საქართველოს ეროვნული ბანკის მონეტარული პოლიტიკის კომიტეტმა 2023 წლის 13 სექტემბერს რეფინანსირების განაკვეთი 25 საბაზისო პუნქტით 10.0%-მდე შეამცირა, რაც მე-3 შემცირებაა მიმდინარე წელს. სებ-ის მიხედვით, ინფლაციის ფორმირებაში საგარეო ფაქტორების როლი მნიშვნელოვნად შემცირდა და ამასთანავე, მოთხოვნის მხრიდან ინფლაციური ზეწოლის განეიტრალების ადრეული ნიშნებიც გამოიკვეთა, რადგან ეკონომიკური ზრდის ტემპი მის პოტენციურ დონეს მიუახლოვდა. ამავდროულად, ადგილობრივი ინფლაციის ზრდის ტემპი განაგრძობს შენელებას, აგვისტოში 6.1%-მდე შემცირდა იანვრის 14.2%-იანი დონიდან. სებ-ის მიმდინარე პროგნოზით, 2023 წლის შემდგომ თვეებში ინფლაცია მიზნობრივ 3.0%-ის ქვემოთ იქნება, ხოლო საშუალოვადიან პერიოდში მის ირგვლივ დასტაბილურდება. ინფლაციის ტენდენციებისა და პროგნოზის გათვალისწინებით, სებ-ი მონეტარული პოლიტიკის ნორმალიზების ნელი ტემპებით გააგრძელებას გეგმავს. მონეტარული პოლიტიკის კომიტეტის შემდეგი სხდომა 2023 წლის 25 ოქტომბერს ჩატარდება.
საგარეო ვაჭრობა: საქსტატის მონაცემებით, 2023 წლის აგვისტოში საქონლის ექსპორტი წლიურად 4.0%-ით გაიზარდა 492.1 მლნ აშშ დოლარამდე, წინა თვის 0.7%-იანი კლების შემდეგ. იმპორტი წლიურად 0.9%-ით გაიზარდა და 1.3 მლრდ აშშ დოლარი შეადგინა, წინა თვეში დაფიქსირებული 2.8%-იანი ზრდის შემდეგ. შედეგად, სავაჭრო დეფიციტი წლიურად 1.0%-ით შემცირდა და 781.9 მლნ აშშ დოლარი შეადგინა, წინა თვის 5.7%-იანი ზრდის შემდეგ.
ჯამურად, 2023 წლის პირველ 8 თვეში, სავაჭრო დეფიციტი წლიურად 20.3%-ით გაიზარდა და 5.9 მლრდ აშშ დოლარი შეადგინა, რადგან ექსპორტი 14.3%-ით გაიზარდა 4.1 მლრდ აშშ დოლარამდე, ხოლო იმპორტი 17.8%-ით გაიზარდა და 9.9 მლრდ აშშ დოლარი შეადგინა.
ფულადი გზავნილები: სებ-ის მიხედვით, 2023 წლის აგვისტოში ფულადი გზავნილები წლიურად 14.1%-ით შემცირდა და 287.0 მლნ აშშ დოლარი შეადგინა. ძირითადი დონორი ქვეყნებიდან ფულადი გზავნილების შემცირება დაფიქსირდა რუსეთიდან (-45.6% წ/წ, -18.3% თ/თ, მთლიანის 21.0%) და ისრაელიდან (-6.7% წ/წ). თუმცა, ამავდროულად, გზავნილების მაღალ წლიურ ზრდას ჰქონდა ადგილი შემდეგი ქვეყნებიდან: იტალია (+23.0%), აშშ (+37.6%), გერმანია (+33.5%), საბერძნეთი (+6.0%), და ყაზახეთი (+54.9%). ჯამურად, 2023 წლის პირველ 8 თვეში ფულადი გზავნილები წლიურად 21.8%-ით გაიზარდა და 3.0 მლრდ აშშ დოლარი შეადგინა.
ხელფასი: საქსტატის მიხედვით, 2023 წლის II კვარტალში საშუალო თვიური ნომინალური ხელფასი წლიურად 17.1%-ით გაიზარდა და 1,805 ლარი შეადგინა, წინა კვარტალში დაფიქსირებული წლიური 18.7%-იანი ზრდის შემდეგ. სექტორების მიხედვით, 2023 წლის II კვარტალში ყველაზე მაღალი საშუალო თვიური ხელფასი დაფიქსირდა შემდეგ დარგებში: ინფორმაცია და კომუნიკაცია (3,800 ლარი, +22.2% წ/წ), ფინანსური და სადაზღვევო საქმიანობა (3,181 ლარი, +19.1% წ/წ), მშენებლობა (2,590 ლარი, +18.9% წ/წ), პროფესიული და სამეცნიერო საქმიანობა (2,525 ლარი, +25.1% წ/წ), ელექტროენერგიის მიწოდება (2,160 ლარი, +20.8% წ/წ) და სახელმწიფო მმართველობა (2,084 ლარი, +17.2% წ/წ). ამასთან, 2023 წლის II კვარტალში, ყველაზე დაბალი საშუალო თვიური ხელფასი ფიქსირდება განათლების (1,049 ლარი, +12.6% წ/წ), წყალმომარაგების (1,150 ლარი, +24.2% წ/წ), სოფლის მეურნეობის (1,277 ლარი, +22.3% წ/წ) და სასტუმროები და რესტორნების (1,378 ლარი, +19.0% წ/წ) დარგებში.
