ეკონომიკური ზრდა: საქსტატის მიხედვით 2023 წლის მე-2 კვარტალში საქართველოს რეალური მშპ 7.5%-ით გაიზარდა, რაც მცირედით, 0.1 პროცენტული პუნქტით მეტია წინასწარ მაჩვენებელთან შედარებით. სექტორულ ჭრილში, ეკონომიკურ ზრდაში მაღალი დადებითი კონტრიბუცია შეიტანეს შემდეგმა დარგებმა: ვაჭრობა (+14.6% წ/წ), მშენებლობა (+22.7% წ/წ), განათლება (+19.6% წ/წ), ინფორმაცია და კომუნიკაცია (+20.2% წ/წ), და სახელმწიფო მმართველობა (+11.1% წ/წ). ამასთან, კლება დაფიქსირდა შემდეგ დარგებში: სოფლის მეურნეობა (-7.1% წ/წ), დამამუშავებელი მრეწველობა (-2.8% წ/წ) და ელექტროენერგიის მიწოდება (-7.0% წ/წ).
საქსტატის ივლისის 5.5%-იანი ეკონომიკური ზრდის წინასწარი შეფასების გათვალისწინებით, 2023 წლის პირველ 7 თვეში საქართველოს ეკონომიკა წლიურად 7.2%-ით გაიზარდა. ამასთან, ჩვენ 2023 წელს 6.8%-იან ზრდას ვპროგნოზირებთ. ზრდის პროგნოზზე ასევე დადებითად მოქმედებს 2023 წლის ბიუჯეტის ცვლილების პროექტი, სადაც ხარჯები და შემოსავლები იზრდება თავდაპირველად დაგეგმილზე უკეთესი მაკრო პარამეტრების ფონზე (ამასთან, დეფიციტის და ვალის მშპ-თან ფარდობის მაჩვენებლები 3.0% და 38.4%-ზეა დაგეგმილი).
საგარეო ვაჭრობა: საქსტატის მონაცემებით, 2023 წლის აგვისტოში საქონლის ექსპორტი წლიურად 4.8%-ით გაიზარდა 495.8 მლნ აშშ დოლარამდე, წინა თვის 0.6%-იანი კლების შემდეგ. იმპორტი წლიურად 0.9%-ით გაიზარდა და 1.3 მლრდ აშშ დოლარი შეადგინა, წინა თვეში დაფიქსირებული 2.8%-იანი ზრდის შემდეგ. შედეგად, სავაჭრო დეფიციტი წლიურად 1.5%-ით შემცირდა და 778.3 მლნ აშშ დოლარი შეადგინა, წინა თვის 5.7%-იანი ზრდის შემდეგ.
2023 წლის აგვისტოში მანქანები (+58.3% წ/წ), სპილენძი (-50.5% წ/წ), ღვინო (-24.7% წ/წ), სპირტიანი სასმელები (+12.7% წ/წ) და ელექტროენერგია (+16.7% წ/წ) იყო ტოპ-5 ექსპორტირებული საქონელი. ამასთან, ექსპორტის 11.7% ევროკავშირზე მოდიოდა (-30.3% წ/წ), 70.7% დსთ-ზე (+21.1% წ/წ) და 17.6% სხვა ქვეყნებზე (-13.3% წ/წ).
2023 წლის აგვისტოში ტოპ-5 იმპორტი იყო მანქანები (+30.9% წ/წ), ნავთობი (-30.1% წ/წ), მედიკამენტები (+35.5% წ/წ), ტელეფონები (+14.6% წ/წ) და სატვირთო მანქანები (+84.0% წ/წ).
ჯამურად, 2023 წლის პირველ 8 თვეში, სავაჭრო დეფიციტი წლიურად 20.2%-ით გაიზარდა და 5.8 მლრდ აშშ დოლარი შეადგინა, რადგან ექსპორტი 14.4%-ით გაიზარდა 4.1 მლრდ აშშ დოლარამდე, ხოლო იმპორტი 17.8%-ით გაიზარდა და 9.9 მლრდ აშშ დოლარი შეადგინა.
მწარმოებელთა ფასების ინდექსი: საქსტატის მონაცემებით, მწარმოებელთა ფასების ინდექსი წლიურად 3.3%-ით შემცირდა 2023 წლის აგვისტოში, წინა თვეში დაფიქსირებული 2.8%-იანი კლების შემდეგ. ფასების შემცირებაზე ყველაზე დიდი ზეგავლენა იქონია ფასების ცვლილებამ დამამუშავებელი მრეწველობის (-3.6% წ/წ) სექციაში.
სავალუტო ინტერვენციები: 2023 წლის 20-21 სექტემბერს ეროვნულმა ბანკმა სავალუტო ბაზარზე 57.2 მლნ აშშ დოლარი გაყიდა ლარზე გაუფასურების წნეხის მოსახსნელად. აღნიშნული ინტერვენციების შედეგად ლარი სწრაფად დასტაბილურდა და ამჟამად დოლარის მიმართ 2.67-ის ფარგლებში ივაჭრება. ჩვენი მოლოდინით ლარი სტაბილურობას შეინარჩუნებს, რადგან ფუნდამენტური ფაქტორები (საგარეო შემოდინებები, ზრდა, ბიუჯეტის პარამეტრები) და ბაზარზე უცხოური ვალუტის მაღალი ლიკვიდობა ლარის მხარდამჭერია. ამასთან, წლის დასაწყისიდან დღემდე სებ-ი უცხოური ვალუტის წმინდა მყიდველია, რომელმაც 1.4 მლრდ აშშ დოლარი შეადგინა, ჩვენი შეფასებით.
