ბაზრის ყოველკვირეული მიმოხილვა
ეკონომიკური ზრდა: საქსტატის წინასწარი მონაცემებით, 2022 წლის ნოემბერში საქართველოს რეალური მშპ წლიური ზრდა 9.3%-მდე დაჩქარდა, წინა თვის 8.3%-იანი ზრდის შემდეგ. ჯამურად, 2022 წლის პირველ 11 თვეში საქართველოს ეკონომიკა წლიურად 10.0%-ით გაიზარდა. ნოემბერში ზრდა დაფიქსირდა მშენებლობის, ტრანსპორტის, საფინანსო და სადაზღვევო საქმიანობის, სამთომოპოვებითი მრეწველობის, ვაჭრობის და მასპინძლობის დარგებში, ხოლო შემცირდა დამამუშავებელი მრეწველობის და უძრავი ქონების სექტორებში. ჩვენი პროგნოზით, საქართველოს ეკონომიკა 10.2%-ით გაიზრდება 2022 წელს, ხოლო 4.8%-ით 2023 წელს.
მიმდინარე ანგარიში: სებ-ის მიხედვით, 2022 წლის მე-3 კვარტალში მიმდინარე ანგარიში პროფიციტული გახდა და მშპ-ის 5.9% შეადგინა, რაც მეორედ დაფიქსირდა 2018 წლის მე-3 კვარტლის შემდეგ. პოზიტიური მიმდინარე ანგარიში ძირითადად მომსახურების ბალანსის (+3.0-ჯერ წ/წ, მშპ-ის 17.4%, რაც განაპირობა ტურიზმის შემოსავლების სწრაფმა აღდგენამ, რომელმაც 2019 წლის მე-3 კვარტლის 122.3% შეადგინა) და ტრასფერტების (+54.3% წ/წ, მშპ-ის 13.1%) მნიშვნელოვანმა ზრდამ განაპირობა. რაც შეეხება საქონლით ვაჭრობის უარყოფით ბალანსს, ის წლიურად 15.7%-ით გაიზარდა 1.2 მლრდ აშშ დოლარამდე, რადგან საქონლის ექსპორტი 50.8%-ით, ხოლო იმპორტი 36.3%-ით გაიზარდა. ამასთან, 2022 წლის მე-3 კვარტალში წმინდა პირდაპირი უცხოური ინვესტიციები წლიურად 2.4-ჯერ გაიზარდა 687.2 მლნ აშშ დოლარამდე (მშპ-ის 10.1%), ხოლო პორტფელური ინვესტიციების ბალანსი უარყოფითი იყო, რომელმაც აღნიშნულ პერიოდში 1.0 მლრდ აშშ დოლარი შეადგინა. ჯამურად, 2022 წლის პირველ 9 თვეში, მიმდინარე ანგარიშის დეფიციტმა მშპ-ის 2.7% შეადგინა, რაც ისტორიულად ყველაზე დაბალი მაჩვენებელია (2021 წლის პირველ 9 თვეში მიმდინარე ანგარიშის დეფიციტი 10.2% იყო).
საბანკო სექტორი: კომერციული ბანკების მიერ გაცემული სესხები წლიურად 5.4%-ით გაიზარდა 2022 წლის ნოემბერში (+1.0% თ/თ), წინა თვის 3.7%-იანი ზრდის შემდეგ და საკრედიტო პორტფელმა 43.7 მლრდ ლარი შეადგინა. ამასთან, გაცვლითი კურსის ეფექტის გამორიცხვით, სესხების პორტფელის წლიური ზრდა ნოემბერში 13.8% იყო (+1.2% თ/თ), იგივე რაც ოქტომბერში დაფიქსირდა. სექტორების მიხედვით, კორპორატიული დაკრედიტების წლიური ზრდის ტემპი 10.1%-მდე (+9.4% ოქტომბერში) დაჩქარდა, ხოლო საცალო დაკრედიტების წლიურმა ზრდამ 17.3% (+17.9% ოქტომბერში) შეადგინა; აქედან, იპოთეკური სესხების პორტფელი წლიურად 13.6%-ით გაიზარდა, წინა თვის 13.8%-იანი ზრდის შემდეგ. 2022 წლის ნოემბერში სესხების დოლარიზაცია მცირედით 44.7%-მდე გაიზარდა (-5.65პპ წ/წ და +0.05პპ თ/თ), ხოლო უმოქმედო სესხები 1.9%-ს გაუტოლდა (-0.32პპ წ/წ და +0.03პპ თ/თ).
საბანკო სექტორში განთავსებული დეპოზიტები წლიურად მნიშვნელოვნად 29.8%-ით გაიზარდა 42.6 მლრდ ლარამდე 2022 წლის ნოემბერში, წინა თვეში დაფიქსირებული 28.0%-იანი ზრდის შემდეგ (გაცვლითი კურსის ეფექტის გამორიცხვით). ვალუტების მიხედვით, ნოემბერში ლარის დეპოზიტების წლიურმა ზრდამ 30.6% (+26.8% წინა თვეში), ხოლო უცხოური ვალუტის დეპოზიტების წლიურმა ზრდამ (გაცვლითი კურსის ეფექტის გამორიცხვით) 29.2% (+28.7% წინა თვეში) შეადგინა. ამასთან, ნოემბერში დეპოზიტების დოლარიზაცია მცირედით 56.7%-მდე შემცირდა (-3.77პპ წ/წ და -0.57პპ თ/თ).
