საერთაშორისო სავალუტო ფონდის განახლებული პროგნოზით, მსოფლიო ეკონომიკა 2023 წლის მსგავსად 3.2%-ით გაიზრდება 2024 და 2025 წლებში. აღსანიშნავია, რომ 2024 წლის მსოფლიო ეკონომიკური ზრდის განახლებული პროგნოზი, წინა პროგნოზთან შედარებით, მცირედით, 0.1 პროცენტული პუნქტით გაუმჯობესებულია. სავალუტო ფონდის მიხედვით, ცენტრალური ბანკების მიერ საპროცენტო განაკვეთების მნიშვნელოვანი ზრდის მიუხედავად, რომელიც მიმართულია ფასების სტაბილურობის აღდგენისკენ, მსოფლიო ეკონომიკა საკმაოდ მედეგი აღმოჩნდა. საერთაშორისო სავალუტო ფონდი ასევე პროგნოზირებს მსოფლიო ინფლაციის მაჩვენებლების სტაბილურ კლებას, 6.8%-დან 2023 წელს 5.9%-მდე 2024 წელს და 4.5%-მდე 2025 წელს. ამასთან, სავალუტო ფონდის პროგნოზით, საქართველოს ეკონომიკა 5.7%-ით გაიზრდება 2024 წელს და 5.2 %-ით 2025 წელს.

საგარეო ვაჭრობა: საქსტატის მონაცემებით, 2024 წლის მარტში საქონლის ექსპორტი წლიურად 4.4%-ით შემცირდა და 522.4 მლნ აშშ დოლარი შეადგინა, წინა თვის 2.0%-იანი ზრდის შემდეგ. იმპორტი წლიურად, მნიშვნელოვნად, 17.0%-ით შემცირდა 1.1 მლრდ აშშ დოლარამდე, წინა თვეში დაფიქსირებული 6.9%-იანი ზრდის შემდეგ. შედეგად, სავაჭრო დეფიციტი წლიურად 25.2%-ით შემცირდა და 622.5 მლნ აშშ დოლარი შეადგინა მარტში.
2024 წლის მარტში მანქანები (+3.6% წ/წ), ღვინო (+63.7% წ/წ), ფეროშენადნობები (+200.5% წ/წ), სპირტი (+39.0% წ/წ) და მინერალური წყალი (+36.6% წ/წ) იყო ტოპ-5 ექსპორტირებული საქონელი. ამასთან, ექსპორტის 10.8% ევროკავშირზე მოდიოდა (-42.6% წ/წ), 66.2% დსთ-ზე (+7.1% წ/წ) და 23.0% სხვა ქვეყნებზე (-4.1% წ/წ). 
2024 წლის მარტში ტოპ-5 იმპორტი იყო მანქანები (-50.8% წ/წ), ნავთობი (+10.0% წ/წ), გაზი (+16.1% წ/წ), მედიკამენტები (+14.3% წ/წ) და ტელეფონები (-42.8% წ/წ). 
ჯამურად, 2024 წლის იანვარ-მარტში, სავაჭრო დეფიციტი წლიურად 2.5%-ით შემცირდა და 2.0 მლრდ აშშ დოლარი შეადგინა, რადგან ექსპორტი 9.3%-ით შემცირდა 1.3 მლრდ აშშ დოლარამდე, ხოლო იმპორტი 5.3%-ით შემცირდა და 3.4 მლრდ აშშ დოლარს გაუტოლდა.

ფულადი გზავნილები: სებ-ის მიხედვით, 2024 წლის მარტში ფულადი გზავნილები წლიურად 36.5%-ით შემცირდა და 278.5 მლნ აშშ დოლარი შედგინა, წინა თვეში დაფიქსირებული წლიური 29.0%-იანი კლების შემდეგ, რაც იხსნება გასული წლის მაღალი ბაზით და გზავნილების ნორმალიზებით რუსეთიდან. ძირითადი დონორი ქვეყნებიდან ფულადი გზავნილები შემცირდა რუსეთიდან (-76.3% წ/წ, მთლიანის 19.0%), ყაზახეთიდან (-32.2% წ/წ, მთლიანის 4.2%) და თურქეთიდან (-19.5% წ/წ, მთლიანის 3.0%). თუმცა, გზავნილები წლიურად მნიშვნელოვნად გაიზარდა შემდეგი ქვეყნებიდან: ევროკავშირი (+9.9%, მთლიანის 42.6%), აშშ (+24.4%, მთლიანის 16.1%) და ისრაელი (+12.5% წ/წ, მთლიანის 7.6%). 
ჯამურად, 2024 წლის იანვარ-მარტში ფულადი გზავნილები წლიურად 35.8%-ით შემცირდა და 806.0 მლნ აშშ დოლარი შეადგინა.

მწარმოებელთა ფასების ინდექსი: საქსტატის მონაცემებით, მწარმოებელთა ფასების ინდექსი წლიურად 4.0%-ით გაიზარდა 2024 წლის მარტში, წინა თვეში დაფიქსირებული 2.0%-იანი ზრდის შემდეგ. მწარმოებელთა ფასების წლიურ ზრდაზე ზეგავლენა იქონია ფასების ზრდამ დამამუშავებელი მრეწველობის (+2.7%) და ელექტროენერგიის მიწოდების (+11.1%) სექციებში.