მონეტარული პოლიტიკა: საქართველოს ეროვნული ბანკის მონეტარული პოლიტიკის კომიტეტმა 2023 წლის 25 ოქტომბერს რეფინანსირების განაკვეთი უცვლელად 10.0%-ზე დატოვა. სებ-ის მიხედვით, საქართველოში ინფლაცია მიზნობრივზე დაბალ ნიშნულზე ნარჩუნდება – სექტემბერში წლიურმა ინფლაციამ 0.7%, ხოლო საბაზო ინფლაციამ 2.5% შეადგინა – რაზეც მნიშვნელოვანი გავლენა საგარეო ფაქტორებიდან მომდინარე წნეხის შესუსტებასა და გამკაცრებულ მონეტარულ პოლიტიკას ჰქონდა. სებ-ის მიმდინარე პროგნოზით, 2023 წლის შემდგომ თვეებში ინფლაცია მიზნობრივ 3.0%-ის ქვემოთ იქნება, ხოლო 2024 წელს მის ირგვლივ დასტაბილურდება. ამასთან, სებ-ი ინფლაციის პროგნოზის კუთხით დამატებით გაურკვევლობას ხედავს მწვავე გეოპოლიტიკური მდგომარეობიდან გამომდინარე და რეფინანსირების განაკვეთის შემცირებას ნელი ტემპით გააგრძელებს. აღნიშნულიდან გამომდინარე, ჩვენ განვაახლეთ რეფინანსირების განაკვეთის პროგნოზი და 2023 წლის დეკემბერში ველოდებით 9.75%-ის დონეზე, ხოლო 2024 წლის ბოლოსთვის 8.75%-მდე შემცირებას, რაც 25 საბაზისო პუნქტით მეტია ჩვენს წინა პროგნოზზე. მონეტარული პოლიტიკის კომიტეტის შემდეგი სხდომა 2023 წლის 20 დეკემბერს ჩატარდება.
საბანკო სექტორი: კომერციული ბანკების მიერ გაცემული სესხები წლიურად 13.7%-ით გაიზარდა 2023 წლის სექტემბერში, წინა თვის 11.1%-იანი ზრდის შემდეგ და საკრედიტო პორტფელმა 49.2 მლრდ ლარი შეადგინა. ამასთან, გაცვლითი კურსის ეფექტის გამორიცხვით, სექტემბერში სესხების პორტფელის წლიურმა ზრდამ 14.9% შეადგინა (+14.6% აგვისტოში). სექტორების მიხედვით, კორპორატიული დაკრედიტების წლიური ზრდა 16.9%-მდე დაჩქარდა (+16.0% აგვისტოში), ხოლო საცალო დაკრედიტება წლიურად 13.3%-ით გაიზარდა (+13.5% აგვისტოში); ამასთან, იპოთეკური სესხების პორტფელი წლიურად 10.0%-ით გაიზარდა (+9.9% აგვისტოში). 2023 წლის სექტემბერში სესხების დოლარიზაციამ 45.0% შეადგინა (-0.40პპ წ/წ და +0.06პპ თ/თ).
2023 წლის სექტემბერში საბანკო სექტორში განთავსებული დეპოზიტები წლიურად 19.6%-ით გაიზარდა (კურსის ეფექტის გამორიცხვით) 49.3 მლრდ ლარამდე. ვალუტების მიხედვით, სექტემბერში ლარის დეპოზიტები წლიურად 35.8%-ით (+38.0% აგვისტოში), ხოლო უცხოური ვალუტის დეპოზიტები წლიურად 7.6%-ით გაიზარდა (+7.2% აგვისტოში). შედეგად, სექტემბერში დეპოზიტების დოლარიზაციამ 50.2% შეადგინა (-6.816პპ წ/წ და +0.45პპ თ/თ).
ტურიზმი: 2023 წლის მე-3 კვარტალში საერთაშორისო ვიზიტორები (ჯამურად ტურისტული და ერთდღიანი ვიზიტები) საქართველოში წლიურად 21.0%-ით გაიზარდა და 2.3 მლნ მოგზაური შეადგინა. აღნიშნული ზრდა ძირითადად ტურისტული ვიზიტების 15.4%-იანმა ზრდამ განაპირობა (1.73 მლნ ტურისტი, 75.0% მთლიან ვიზიტებში), რასაც მოჰყვება ერთდღიანი ვიზიტები (+41.6% წ/წ). ყველაზე მეტი ვიზიტორი შემოვიდა რუსეთიდან (24.9% წილი ჯამურ ვიზიტებში), თურქეთიდან (21.7% წილი) და სომხეთიდან (14.7% წილი). ვიზიტორთა უმრავლესობა საქართველოში შემოვიდა საავტომობილო ტრანსპორტით (69.2%-იანი წილი), რასაც მოსდევს საჰაერო გზით შემოსვლა (29.8%-იანი წილი).
ჯამურად, 2023 წლის იანვარ-სექტემბერში საქართველომ 4.8 მლნ მოგზაურს უმასპინძლა, საიდანაც ტურისტული ვიზიტები იყო 3.7 მლნ (2019 წლის იანვარ-სექტემბრის 91.6%), ხოლო ერთდღიანმა ვიზიტებმა 1.2 მლნ შეადგინა, რაც 2019 წლის იანვარ-სექტემბრის 58.9%-ია (დაბალი აღდგენა იხსნება აზერბაიჯანის მიერ საზღვრის კვეთის შეზღუდვებით).
