ეკონომიკური ზრდა: საქსტატის წინასწარი მონაცემებით, 2024 წლის თებერვალში საქართველოს ეკონომიკა 9.5%-ით გაიზარდა, წინა თვეში დაფიქსირებული 5.8%-იანი ზრდის შემდეგ. ჯამურად, 2024 წლის იანვარ-თებერვალში საქართველოს ეკონომიკა წლიურად 7.7%-ით გაიზარდა. თებერვალში ეკონომიკის ზრდა ძირითადად განაპირობა მრეწველობის, მშენებლობის, პროფესიული და სამეცნიერო საქმიანობების, IT და ტრანსპორტის დარგებმა. ამასთან, რეალური ზრდა შემცირდა ენერგეტიკის და სამთომოპოვებითი მრეწველობის დარგებში.
ჩვენი საბაზისო სცენარით, 2024 წელს საქართველოს ეკონომიკა მოსალოდნელია 6.0%-ით გაიზარდოს, ხოლო ოპტიმისტური სცენარით 7.0%-იან ზრდას ველოდებით (იხილეთ უახლესი მაკრო პროგნოზები აქ).
საკრედიტო რეიტინგი: 2024 წლის 26 მარტს Moody’s-მა საქართველოს სუვერენული საკრედიტო რეიტინგი Ba2 დონეზე დატოვა, თუმცა ნეგატიური პერსპექტივა სტაბილურით შეცვალა. Moody’s-ის პროგნოზით, საქართველოს ეკონომიკა 5.5%-ით გაიზრდება 2024 წელს და 5-5.5%-ის ფარგლებში შენარჩუნდება ზრდა საშუალოვადიან პერიოდში.
მიმდინარე ანგარიში: 2023 წლის მე-4 კვარტალში მიმდინარე ანგარიშის დეფიციტი მშპ-ის 6.7%-მდე შემცირდა, გასული წლის ანალოგიურ პერიოდში არსებული 7.4%-იანი დონიდან. აღნიშნული შემცირება ძირითადად საქონლით ვაჭრობის დეფიციტის წლიურმა 8.7%-იანმა კლებამ განაპირობა.
ჯამურად, 2023 წელს, საქართველოს მიმდინარე ანგარიშის დეფიციტმა ისტორიული მინიმუმი მშპ-ის 4.3% შეადგინა. დეფიციტის შემცირება ძირითადად ტურიზმიდან მიღებული შემოსავლებისა (+17.3% წ/წ) და IT მომსახურების ექსპორტის (+53.2% წ/წ) ზრდამ განაპირობა. დეფიციტის შემცირებაზე ასევე პოზიტიურად მოქმედებდა ტრანსფერტების ბალანსის წლიური 9.1%-იანი ზრდა. აღსანიშნავია, რომ პირდაპირი უცხოური ინვესტიციები (მშპ-ის 4.3%) მიმდინარე ანგარიშის დეფიციტის დაფინანსების ძირითად წყაროს წარმოადგენდა.
ჩვენი პროგნოზით, მიმდინარე ანგარიშის დეფიციტი მშპ-ის 4.7%-ის დონეზეა მოსალოდნელი 2024 წელს.
საბანკო სექტორი: კომერციული ბანკების მიერ გაცემული სესხები წლიურად 17.5%-ით გაიზარდა 2024 წლის თებერვალში, წინა თვის 16.7%-იანი ზრდის შემდეგ და საკრედიტო პორტფელმა 52.2 მლრდ ლარი შეადგინა. ამასთან, გაცვლითი კურსის ეფექტის გამორიცხვით, თებერვალში სესხების პორტფელის წლიურმა ზრდამ 16.4% შეადგინა. სექტორების მიხედვით, კორპორატიული დაკრედიტება კურსის ეფექტის გამორიცხვით წლიურად 19.0%-ით გაიზარდა, ხოლო საცალო დაკრედიტების წლიური ზრდა 14.3% იყო; 2024 წლის თებერვალში სესხების დოლარიზაცია 44.3%-მდე შემცირდა (-0.39პპ წ/წ და -0.40პპ თ/თ).
2024 წლის თებერვალში საბანკო სექტორში განთავსებული დეპოზიტები წლიურად 14.8%-ით გაიზარდა (კურსის ეფექტის გამორიცხვით) 50.5 მლრდ ლარამდე, წინა თვეში დაფიქსირებული 15.3%-იანი წლიური ზრდის შემდეგ. ვალუტების მიხედვით, თებერვალში ლარის დეპოზიტები წლიურად 28.4%-ით (+29.3% წინა თვეში) გაიზარდა, ხოლო უცხოური ვალუტის დეპოზიტების წლიური ზრდა 3.6% იყო (+3.9% წინა თვეში). შედეგად, თებერვალში დეპოზიტების დოლარიზაციამ 49.8% შეადგინა (-4.92პპ წ/წ და +0.06პპ თ/თ).
ეროვნულმა ბანკმა თებერვალში რეზერვები შეავსო
სებ-მა 2024 წლის თებერვალში 77.5 მლნ აშშ დოლარი შეისყიდა BMatch პლატფორმის საშუალებით. ჯამურად, 2024 წლის იანვარ-თებერვალში, სებ-ის წმინდა შესყიდვამ 85.6 მლნ აშშ დოლარი შეადგინა.
