მონეტარული პოლიტიკა: 2024 წლის 13 მარტს საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთი 75 საბაზისო პუნქტით 8.25%-მდე შეამცირა, დაბალინფლაციური გარემოს და შემცირებული ინფლაციური რისკების გათვალისწინებით. ეროვნული ბანკის მიხედვით ინფლაციის ერთ-ერთ მთავარ რისკად წითელ ზღვაში არსებული დაძაბულობის გამო საერთაშორისო ტრანსპორტირების გაძვირება წარმოადგენდა, თუმცა თებერვლის განმავლობაში ტრანსპორტირების ფასებმა მცირედით მოიკლო წინა თვის მკვეთრი ზრდის შემდეგ. ამასთან, სებ-ი აღნიშნავს, რომ ეკონომიკური აქტივობა ეტაპობრივად თავის პოტენციურ ტრენდს უბრუნდება, რაც მოთხოვნის მხრიდან ინფლაციური ზეწოლის განეიტრალებაზე მიუთითებს. რეგულატორის შეფასებით, ინფლაცია 2024 წლის დასაწყისში მიზნობრივ 3.0%-იან დონეზე დაბალი დარჩება, ხოლო საშუალოვადიან პერიოდში მის ირგვლივ დასტაბილურდება. 
მონეტარული პოლიტიკის კომიტეტის შემდეგი სხდომა 2024 წლის 8 მაისს ჩატარდება.

საგარეო ვაჭრობა: საქსტატის მონაცემებით, 2024 წლის იანვარში საქონლის ექსპორტი წლიურად 1.9%-ით გაიზარდა და 464.6 მლნ აშშ დოლარი შეადგინა, წინა თვის 26.2%-იანი შემცირების შემდეგ. ასევე, იმპორტიც წლიურად 3.6%-ით გაიზარდა 1.1 მლრდ აშშ დოლარამდე, წინა თვეში დაფიქსირებული 7.5%-იანი კლების შემდეგ. შედეგად, სავაჭრო დეფიციტი წლიურად 4.9%-ით გაიზარდა და 642.1 მლნ აშშ დოლარი შეადგინა თებერვალში.
ჯამურად, 2024 წლის იანვარ-თებერვალში, სავაჭრო დეფიციტი წლიურად 5.3%-ით გაიზარდა 1.3 მლრდ აშშ დოლარამდე, რადგან ექსპორტი 12.2%-ით შემცირდა და 803.2 მლნ აშშ დოლარი შეადგინა, ხოლო იმპორტი 2.0%-ით შემცირდა და 2.1 მლრდ აშშ დოლარს გაუტოლდა.

ფულადი გზავნილები: სებ-ის მიხედვით, 2024 წლის თებერვალში ფულადი გზავნილები წლიურად 26.9%-ით შემცირდა და 272.3 მლნ აშშ დოლარი შედგინა, წინა თვეში დაფიქსირებული წლიური 40.5%-იანი კლების შემდეგ, რაც იხსნება გასული წლის მაღალი ბაზით და გზავნილების ნორმალიზებით რუსეთიდან. ძირითადი დონორი ქვეყნებიდან ფულადი გზავნილები შემცირდა რუსეთიდან (-66.8% წ/წ, მთლიანის 22.8%), ყაზახეთიდან (-17.8% წ/წ, მთლიანის 3.9%) და თურქეთიდან (-11.7% წ/წ, მთლიანის 2.8%). თუმცა, გზავნილები წლიურად მნიშვნელოვნად გაიზარდა შემდეგი ქვეყნებიდან: ევროკავშირი (+15.0%, მთლიანის 39.9%), აშშ (+35.3%, მთლიანის 15.1%) და ისრაელი (+24.5% წ/წ, მთლიანის 7.5%). 
ჯამურად, 2024 წლის იანვარ-თებერვალში ფულადი გზავნილები წლიურად 34.5%-ით შემცირდა და 535.5 მლნ აშშ დოლარი შეადგინა.