ხელფასი: საქსტატის მიხედვით, 2023 წლის მე-4 კვარტალში საშუალო თვიური ნომინალური ხელფასი წლიურად 15.3%-ით გაიზარდა და 2,045 ლარი შეადგინა, წინა კვარტალში დაფიქსირებული წლიური 16,3%-იანი ზრდის შემდეგ. ამასთან, აღნიშნულ პერიოდში, რეალური ხელფასი 14,8%-ით გაიზარდა ინფლაციის მნიშვნელოვნად შემცირების გამო.
სექტორების მიხედვით, 2023 წლის მე-4 კვარტალში ყველაზე მაღალი საშუალო თვიური ხელფასი დაფიქსირდა შემდეგ დარგებში: ინფორმაცია და კომუნიკაცია (4,309 ლარი, +17.3% წ/წ), ფინანსური და სადაზღვევო საქმიანობა (3,110 ლარი, +14,1% წ/წ) და მშენებლობა (3,063 ლარი, +20,8% წ/წ). ამასთან, აღნიშნულ პერიოდში ყველაზე დაბალი საშუალო თვიური ხელფასი ფიქსირდება განათლების (1,157 ლარი, +15.0% წ/წ), წყალმომარაგების (1,320 ლარი, +16.1% წ/წ) და სოფლის მეურნეობის (1,463 ლარი, +24.1% წ/წ) დარგებში.
საშუალოდ, 2023 წელს თვიური ნომინალური ხელფასი 20.4%-ით გაიზარდა 2023 წელს, წინა წლის 18.3%-იანი ზრდის შემდეგ.
ეკონომიკური ზრდა: საქსტატის მიხედვით 2023 წლის მე-4 კვარტალში საქართველოს რეალური მშპ 6.9%-ით გაიზარდა, რაც 0.1პპ-ით მეტია წინასწარ მაჩვენებელთან შედარებით. ჯამურად, 2023 წელს საქართველოს ეკონომიკა 7.5%-ით გაიზარდა. აღნიშნულ პერიოდში ნომინალური მშპ 10.1%-ით გაიზარდა და 80.2 მლრდ ლარი შეადგინა ($30.5 მლრდ). ეკონომიკის მაღალი ზრდისა და ლარის გამყარების შედეგად, ერთ სულ მოსახლეზე მშპ წლიურად 22.0%-ით გაიზარდა და 8,210 აშშ დოლარს მიაღწია 2023 წელს.
სექტორულ ჭრილში, ეკონომიკურ ზრდაში მაღალი დადებითი კონტრიბუცია შეიტანეს შემდეგმა დარგებმა: ვაჭრობა (+13.6% წ/წ), მშენებლობა (+17.2% წ/წ), IT (+27.4% წ/წ), სახელმწიფო მმართველობა (+13.7% წ/წ) და განათლება (+18.9% წ/წ). ამასთან, კლება დაფიქსირდა ჯანდაცვის (-15.4% წ/წ), უძრავი ქონების (-2.5% წ/წ) და სოფლის მეურნეობის (-2.8% წ/წ) დარგებში.
ჩვენი საბაზისო სცენარით, საქართველოს ეკონომიკა 6.0%-ით გაიზრდება 2024 წელს, ხოლო ომტიმისტური სცენარით ზრდა 7.0%-ის დონეზეა მოსალოდნელი.
საგარეო ვაჭრობა: საქსტატის მონაცემებით, 2024 წლის თებერვალში საქონლის ექსპორტი წლიურად 2.0%-ით გაიზარდა და 464.7 მლნ აშშ დოლარი შეადგინა, წინა თვის 26.2%-იანი შემცირების შემდეგ. ასევე, იმპორტიც წლიურად 4.4%-ით გაიზარდა 1.1 მლრდ აშშ დოლარამდე, წინა თვეში დაფიქსირებული 7.5%-იანი კლების შემდეგ. შედეგად, სავაჭრო დეფიციტი წლიურად 6.3%-ით გაიზარდა და 650.6 მლნ აშშ დოლარი შეადგინა თებერვალში.
2024 წლის თებერვალში მანქანები (+13.6% წ/წ), ღვინო (+58.8% წ/წ), ფეროშენადნობები (+8.6% წ/წ), სპირტი (+93.6% წ/წ) და ძვირფასი ლითონები (+87.0% წ/წ) იყო ტოპ-5 ექსპორტირებული საქონელი. ამასთან, ექსპორტის 8.7% ევროკავშირზე მოდიოდა (-4.1% წ/წ), 66.6% დსთ-ზე (+21.3% წ/წ) და 24.7% სხვა ქვეყნებზე (-27.6% წ/წ).
2024 წლის თებერვალში ტოპ-5 იმპორტი იყო მანქანები (-36.3% წ/წ), ნავთობი (+40.5% წ/წ), გაზი (-30.4% წ/წ), მედიკამენტები (-11.8% წ/წ) და ტელეფონები (+5.7% წ/წ).
ჯამურად, 2024 წლის იანვარ-თებერვალში, სავაჭრო დეფიციტი წლიურად 5.9%-ით გაიზარდა 1.3 მლრდ აშშ დოლარამდე, რადგან ექსპორტი 12.2%-ით შემცირდა და 803.3 მლნ აშშ დოლარი შეადგინა, ხოლო იმპორტი 1.6%-ით შემცირდა და 2.1 მლრდ აშშ დოლარს გაუტოლდა.
მწარმოებელთა ფასების ინდექსი: საქსტატის მონაცემებით, მწარმოებელთა ფასების ინდექსი წლიურად 2.0%-ით გაიზარდა 2024 წლის თებერვალში (პირველად დაფიქსირდა ზრდა 2023 წლის იანვრის შემდეგ), ხოლო წინა თვესთან შედარებით ზრდა 1.4% იყო. მწარმოებელთა ფასების თვიურ ზრდაზე ზეგავლენა იქონია ფასების ზრდამ დამამუშავებელი მრეწველობის (+1.6%) და ელექტროენერგიის მიწოდების (+1.1%) სექციაში.
