საბანკო სექტორი: კომერციული ბანკების მიერ გაცემული სესხები წლიურად 17.6%-ით გაიზარდა 2023 წლის დეკემბერში წინა თვის 17.3%-იანი ზრდის შემდეგ და საკრედიტო პორტფელმა 52.7 მლრდ ლარი შეადგინა. ამასთან, გაცვლითი კურსის ეფექტის გამორიცხვით, დეკემბერში სესხების პორტფელის წლიურმა ზრდამ 17.1% შეადგინა (+16.3% ნოემბერში). სექტორების მიხედვით, კორპორატიული დაკრედიტება კურსის ეფექტის გამორიცხვით წლიურად 19.8%-ით გაიზარდა (+19.3% ნოემბერში), ხოლო საცალო დაკრედიტების წლიური ზრდა 14.8% იყო (+13.7% ნოემბერში); 2023 წლის დეკემბერში სესხების დოლარიზაციამ 45.2% შეადგინა (+0.28პპ წ/წ და -0.26პპ თ/თ). 
2023 წლის დეკემბერში საბანკო სექტორში განთავსებული დეპოზიტები წლიურად 14.1%-ით გაიზარდა (კურსის ეფექტის გამორიცხვით) 50.6 მლრდ ლარამდე, წინა თვეში დაფიქსირებული 17.8%-იანი წლიური ზრდის შემდეგ. ვალუტების მიხედვით, დეკემბერში ლარის დეპოზიტები წლიურად 28.2%-ით (+34.6% ნოემბერში) გაიზარდა, ხოლო უცხოური ვალუტის დეპოზიტების წლიური ზრდა 3.1% იყო (+4.9% ნოემბერში). შედეგად, დეკემბერში დეპოზიტების დოლარიზაციამ 50.7% შეადგინა (-5.36პპ წ/წ და -0.03პპ თ/თ).

მწარმოებელთა ფასების ინდექსი: საქსტატის მონაცემებით, მწარმოებელთა ფასების ინდექსი წლიურად 1.3%-ით შემცირდა 2023 წლის დეკემბერში, წინა თვეში დაფიქსირებული 0.2%-იანი წლიური კლების შემდეგ. ფასების წლიურ შემცირებაზე ძირითადი ზეგავლენა ჰქონდა ფასების კლებას დამამუშავებელი მრეწველობის (-1.6%) სექციაში.

საგარეო ვაჭრობა: საქსტატის მონაცემებით, 2023 წლის დეკემბერში საქონლის ექსპორტი წლიურად 7.5%-ით შემცირდა და 514.2 მლნ აშშ დოლარი შეადგინა, წინა თვის 1.8%-იანი შემცირების შემდეგ. აღნიშნული კლება გასული წლის მაღალი ბაზით იხსნება. ასევე, იმპორტიც წლიურად 11.3%-ით შემცირდა 1.3 მლრდ აშშ დოლარამდე, წინა თვეში დაფიქსირებული 6.8%-იანი კლების შემდეგ. შედეგად, სავაჭრო დეფიციტი წლიურად 13.6%-ით შემცირდა და 789.5 მლნ აშშ დოლარი შეადგინა.
2023 წლის დეკემბერში მანქანები (+27.4% წ/წ), ფეროშენადნობები (+550.8% წ/წ), ციტრუსები (+124.4% წ/წ), ალკოჰოლური სასმელები (+37.8% წ/წ) და ღვინო (-6.4% წ/წ) იყო ტოპ-5 ექსპორტირებული საქონელი. ამასთან, ექსპორტის 6.9% ევროკავშირზე მოდიოდა (-44.8% წ/წ), 68.8% დსთ-ზე (+9.7% წ/წ) და 24.4% სხვა ქვეყნებზე (-26.1% წ/წ). 
2023 წლის დეკემბერში ტოპ-5 იმპორტი იყო მანქანები (-22.6% წ/წ), ნავთობი (+12.9% წ/წ), გაზი (-33.4% წ/წ), მედიკამენტები (+21.8% წ/წ) და ტელეფონები (-27.7% წ/წ). 

ჯამურად, 2023 წელს როგორც ექსპორტი, ისე იმპორტი რეკორდულ დონემდე გაიზარდა. საქონლის ექსპორტი წლიურად 9.1%-ით გაიზარდა 6.1 მლრდ აშშ დოლარამდე, ხოლო იმპორტი 14.0%-ით გაიზარდა და 15.4 მლრდ აშშ დოლარი შეადგინა. შედეგად, სავაჭრო დეფიციტი წლიურად 17.4%-ით გაიზარდა და 9.3 მლრდ აშშ დოლარი შეადგინა.