ეკონომიკური ზრდა: საქსტატის წინასწარი მონაცემებით, 2024 წლის დეკემბერში რეალური მშპ 6.7%-ით გაიზარდა, წინა თვის 7.5%-იანი ზრდის შემდეგ. აღნიშნული ზრდა ძირითადად განაპირობა საფინანსო, პროფესიული და სამეცნიერო, ტრანსპორტის, ვაჭრობის და ინფორმაცია და კომუნიკაციის დარგებმა. ამასთან, კლება დაფიქსირდა დამამუშავებელი მრეწველობის დარგში.
ჯამურად, 2024 წელს საქართველოს ეკონომიკა წლიურად 9.5%-ით გაიზარდა, 2023 წელს დაფიქსირებული 7.8%-იანი ზრდის შემდეგ. ნომინალური მშპ 13.5%-ით გაიზარდა და 91.8 მლრდ ლარი (33.7 მლრდ აშშ დოლარი) შეადგინა, ხოლო მშპ ერთ სულ მოსახლეზე 9,124 აშშ დოლარს გაუტოლდა.
2025 წელს, ჩვენი საბაზისო სცენარით, საქართველოს ეკონომიკა 5.0%-ით გაიზრდება (იხილეთ 2025 წლის საბაზისო და სხვა მაკრო სცენარები დეტალურად აქ).
საბანკო სექტორი: კომერციული ბანკების მიერ გაცემული სესხები წლიურად 18.2%-ით გაიზარდა 2024 წლის დეკემბერში, წინა თვის 18.4%-იანი ზრდის შემდეგ და საკრედიტო პორტფელმა 62.2 მლრდ ლარი შეადგინა. ამასთან, გაცვლითი კურსის ეფექტის გამორიცხვით, დეკემბერში სესხების პორტფელის წლიურმა ზრდამ 17.0% შეადგინა (+2.4% თ/თ). სექტორების მიხედვით, კორპორატიული დაკრედიტება კურსის ეფექტის გამორიცხვით წლიურად 17.8%-ით გაიზარდა, ხოლო საცალო დაკრედიტების წლიური ზრდა 16.3% იყო; 2024 წლის დეკემბერში სესხების დოლარიზაცია 43.3%-მდე გაიზარდა (-1.92პპ წ/წ და +0.53პპ თ/თ).
2024 წლის დეკემბერში საბანკო სექტორში განთავსებული დეპოზიტები წლიურად 13.4%-ით გაიზარდა (კურსის ეფექტის გამორიცხვით) 58.3 მლრდ ლარამდე, წინა თვეში დაფიქსირებული 14.0%-იანი წლიური ზრდის შემდეგ. ვალუტების მიხედვით, დეკემბერში ლარის დეპოზიტების წლიური ზრდა 10.5%-მდე შენელდა (+12.8% წინა თვეში), ხოლო უცხოური ვალუტის დეპოზიტები წლიურად 16.3%-ით გაიზარდა (+15.2% წინა თვეში). შედეგად, დეკემბერში დეპოზიტების დოლარიზაცია 52.8%-მდე გაიზარდა (+2.04პპ წ/წ და +1.08პპ თ/თ).
მონეტარული პოლიტიკა: სებ-ის მონეტარული პოლიტიკის კომიტეტმა 2025 წლის 29 იანვარს რეფინანსირების განაკვეთი უცვლელად 8.0%-ზე დატოვა. სებ-ის მიხედვით, აღნიშნული გადაწყვეტილება შიდა და გეოპოლიტიკური ტურბულენტობის ფონზე შექმნილი გაურკვევლობის შედეგია. ამასთან, რეგულატორი ფრთხილი რჩება სამომავლო განაკვეთის კორექტირებასთან დაკავშირებით და აღნიშნავს, რომ მისი ეტაპობრივი ნორმალიზება ნეიტრალურ 7.0%-იან დონემდე დაეფუძნება მომავალ ეკონომიკურ მონაცემებსა და რისკების ანალიზს. მონეტარული პოლიტიკის კომიტეტის შემდეგი სხდომა 2025 წლის 12 მარტს ჩატარდება.
dსავალუტო ინტერვენციები: 2024 წლის დეკემბერში ეროვნულმა ბანკმა სავალუტო ბაზარზე 28.6 მლნ აშშ დოლარი იყიდა. ჯამურად, 2024 წელს, სებ-ის წმინდა სავალუტო გაყიდვებმა 434.8 მლნ აშშ დოლარი შეადგინა.
