უმუშევრობა: საქსტატის მონაცემებით, 2024 წელს უმუშევრობის დონე წლიურად 2.5 პროცენტული პუნქტით შემცირდა და ისტორიული მინიმუმი 13.9% შეადგინა. აღნიშნულ პერიოდში დაქირავებით დასაქმებულთა რაოდენობა წლიურად 4.3%-ით გაიზარდა და მთლიანი დასაქმების 68.5% შეადგინა, ხოლო თვითდასაქმებულების წლიური ზრდა 6.7% იყო. ამასთან, სამუშაო ძალის მონაწილეობის დონე წლიურად 1.5 პროცენტული პუნქტით 54.8%-მდე გაიზარდა 2024 წელს.
ჩვენი პროგნოზით, უმუშევრობის დონე 13.5%-მდე შემცირდება 2025 წელს.

ფულადი გზავნილები: სებ-ის მიხედვით, 2025 წლის იანვარში ფულადი გზავნილები წლიურად 8.5%-ით შემცირდა 242.4 მლნ აშშ დოლარამდე, წინა თვეში დაფიქსირებული წლიური 8.2%-იანი კლების შემდეგ. ძირითადი დონორი ქვეყნებიდან ფულადი გზავნილების წლიური ზრდა დაფიქსირდა ევროკავშირიდან (+7.8%, მთლიანის 46.5%), აშშ-დან (+23.2%, მთლიანის 19.5%), ისრაელიდან (+19.1%, მთლიანის 8.8%) და ყირგიზეთიდან (+126.2%, მთლიანის 2.5%). ამასთან, ფულადი გზავნილები წლიურად შემცირდა რუსეთიდან (-62.4%, მთლიანის 10.5%) და ყაზახეთიდან (-49.5%, მთლიანის 2.0%). 
ჩვენი პროგნოზით, ფულადი გზავნილები 3.2 მლრდ აშშ დოლარს გაუტოლდება 2025 წელს.

საგარეო ვაჭრობა: საქსტატის მონაცემებით, 2025 წლის იანვარში საქონლის ექსპორტი წლიურად 19.3%-ით გაიზარდა და 403.9 მლნ აშშ დოლარი შეადგინა, წინა თვეში დაფიქსირებული წლიური 6.8%-იანი ზრდის შემდეგ. ამასთან, იმპორტი წლიურად 45.5%-ით გაიზარდა 1.6 მლრდ აშშ დოლარამდე, წინა თვის 22.2%-იანი ზრდის შემდეგ. შედეგად, იანვარში სავაჭრო დეფიციტი წლიურად 57.2%-ით გაიზარდა 1.2 მლრდ აშშ დოლარამდე.
2025 წლის იანვარში მანქანები (+16.0% წ/წ), სპირტიანი სასმელები (+10.2% წ/წ), სპილენძი (+13.8 მლნ აშშ დოლარი წ/წ), მინერალური წყლები (+46.6% წ/წ) და ღვინო (-28.0% წ/წ) იყო ტოპ-5 ექსპორტირებული საქონელი. ამასთან, ექსპორტის 13.2% ევროკავშირზე მოდიოდა (+45.9% წ/წ), 64.2% დსთ-ზე (+15.8% წ/წ) და 22.6% სხვა ქვეყნებზე (+16.7% წ/წ). 
2025 წლის იანვარში ტოპ-5 იმპორტი იყო სურათები/ნახატები (+481.1 მლნ აშშ დოლარი წ/წ), მანქანები (-23.1% წ/წ), ნავთობი (+32.9% წ/წ), გაზი (+8.7% წ/წ) და მედიკამენტები (-20.2% წ/წ).

მწარმოებელთა ფასების ინდექსი: საქსტატის მონაცემებით, მწარმოებელთა ფასების ინდექსი წლიურად 7.2%-ით გაიზარდა 2025 წლის იანვარში, წინა თვეში არსებული 7.9%-იანი ზრდის შემდეგ. მწარმოებელთა ფასების წლიურ ზრდაზე ძირითადი ზეგავლენა იქონია ფასების ზრდამ დამამუშავებელი მრეწველობის (+6.1%), სამთომოპოვებითი მრეწველობის (+24.1%) და ელექტროენერგიის მიწოდების (+8.0%) სექციებში.