ეკონომიკური ზრდა: საქსტატის წინასწარი მონაცემებით, 2025 წლის იანვარში რეალური მშპ-ის ზრდა 11.1%-მდე დაჩქარდა, წინა თვეში დაფიქსირებული 6.7%-იანი ზრდის შემდეგ. აღნიშნული ზრდა ძირითადად განაპირობა პროფესიული და სამეცნიერო, ტრანსპორტის, მშენებლობის, ინფორმაცია და კომუნიკაციის, დამამუშავებელი მრეწველობის და ვაჭრობის დარგებმა. ამასთან, კლება დაფიქსირდა სამთომოპოვებითი მრეწველობის დარგში.
იანვრის მაღალი ზრდის ტემპის გათვალისწინებით, ჩვენ განვიხილავთ 2025 წლის საბაზისო 5.0%-იანი ეკონომიკური ზრდის პროგნოზის გადახედვას ზრდის მიმართულებით, მას შემდეგ რაც თებერვლის წინასწარი მონაცემები ხელმისაწვდომი გახდება (იხილეთ უახლესი მაკრო პროგნოზები აქ).
საბანკო სექტორი: კომერციული ბანკების მიერ გაცემული სესხები წლიურად 20.8%-ით გაიზარდა 2025 წლის იანვარში, წინა თვის 18.2%-იანი ზრდის შემდეგ და საკრედიტო პორტფელმა 62.7 მლრდ ლარი შეადგინა. ამასთან, გაცვლითი კურსის ეფექტის გამორიცხვით, იანვარში სესხების პორტფელის წლიურმა ზრდამ 17.9% შეადგინა (-0.3% თ/თ). სექტორების მიხედვით, კორპორატიული დაკრედიტება კურსის ეფექტის გამორიცხვით წლიურად 20.1%-ით გაიზარდა, ხოლო საცალო დაკრედიტების წლიური ზრდა 16.4% იყო; 2025 წლის იანვარში სესხების დოლარიზაცია 43.7%-მდე გაიზარდა (-0.98პპ წ/წ და +0.36პპ თ/თ).
2025 წლის იანვარში საბანკო სექტორში განთავსებული დეპოზიტები წლიურად 12.6%-ით გაიზარდა (კურსის ეფექტის გამორიცხვით) 59.0 მლრდ ლარამდე, წინა თვეში დაფიქსირებული 13.4%-იანი წლიური ზრდის შემდეგ. ვალუტების მიხედვით, იანვარში ლარის დეპოზიტების წლიური ზრდა 8.0%-მდე შენელდა (+10.5% წინა თვეში), ხოლო უცხოური ვალუტის დეპოზიტები წლიურად 17.3%-ით გაიზარდა (+16.3% წინა თვეში). შედეგად, იანვარში დეპოზიტების დოლარიზაცია 53.4%-მდე გაიზარდა (+3.59პპ წ/წ და +0.60პპ თ/თ).
