ინფლაცია: 2025 წლის თებერვალში წლიური ინფლაცია 2.4%-მდე გაიზარდა, წინა თვეში დაფიქსირებული 2.0%-იანი ინფლაციის შემდეგ. თებერვალში ინფლაციის ზრდა ძირითადად განაპირობა ადგილობრივი ინფლაციის წლიურმა 3.0%-იანმა ზრდამ (+2.3% წ/წ წინა თვეში), რომელსაც მოჰყვება იმპორტირებული ინფლაციის წლიური 0.5%-იანი ზრდა (-0.4% წ/წ წინა თვეში). ამასთან, შერეული საქონლის ფასების წლიური ზრდის ტემპი, მცირედით, 3.1%-ით შენელდა თებერვალში, წინა თვეში არსებული 3.5%-დან. რაც შეეხება საბაზო ინფლაციას, რომელიც კალათიდან გამორიცხავს სურსათის, ენერგომატარებლების და თამბაქოს ფასებს, 2025 წლის თებერვალში, წინა თვის მსგავსად, 2.0% შეადგინა.
სასაქონლო ჯგუფების მიხედვით, 2025 წლის თებერვალში წლიური ინფლაციის ფორმირებაზე მნიშვნელოვანი გავლენა იქონია ფასების ცვლილებამ შემდეგ ჯგუფებში: სურსათი და უალკოჰოლო სასმელები (+3.7% წ/წ, +1.25პპ), ჯანდაცვა (+5.4% წ/წ, +0.45პპ), ალკოჰოლური სასმელები, თამბაქო (+4.7%, +0.32პპ), განათლება (+5.2% წ/წ, +0.26პპ), სასტუმროები და რესტორნები (+6.8%, +0.23პპ), ავეჯი, საოჯახო ნივთები, სახლის მოვლა (-2.1% წ/წ, -0.11პპ) და კავშირგაბმულობა (-12.2% წ/წ, -0.45პპ).
ამასთან, თვიურ ჭრილში 2025 წლის თებერვალში 0.4%-იანი ინფლაცია დაფიქსირდა, რომელიც ძირითადად სურსათი და უალკოჰოლო სასმელების (+0.7% თ/თ, +0.20პპ) და ჯანდაცვის (+2.3% წ/წ, +0.18პპ) ჯგუფებში ფასების ზრდამ განაპირობა.
ჩვენი პროგნოზით, 2025 წელს საშუალო წლიური ინფლაცია 3.9%-ის დონეზეა მოსალოდნელი.
ტურიზმის შემოსავლები: ჩვენი შეფასებით, 2025 წლის თებერვალში ტურიზმიდან მიღებულმა შემოსავლებმა 246 მლნ აშშ დოლარი შეადგინა (უცვლელი წ/წ). ჯამურად, 2025 წლის იანვარ-თებერვალში ტურიზმიდან მიღებული შემოსავლები წლიურად 0.7%-ით გაიზარდა და 536 მლნ აშშ დოლარს გაუტოლდა, ჩვენი შეფასებით.
ჩვენი პროგნოზით, ტურიზმიდან მიღებული შემოსავლები 4.5 მლრდ აშშ დოლარს მიაღწევს 2025 წელს.
საერთაშორისო რეზერვები: საქართველოს ეროვნული ბანკის თანახმად, 2025 წლის თებერვალში ოფიციალური საერთაშორისო რეზერვები წლიურად 10.8%-ით შემცირდა და 4.2 მლრდ აშშ დოლარი შეადგინა. ამასთან, თებერვალში წინა თვესთან შედარებით რეზერვები 4.5%-ით შემცირდა (-201.8 მლნ აშშ დოლარი). რეზერვების ცვლილება უკავშირდება მთავრობის და/ან საბანკო სექტორის სავალუტო ოპერაციებს. აღსანიშნავია, რომ 2025 წლის თებერვლის მდგომარეობით მონეტარული ოქრო მთლიანი საერთაშორისო რეზერვების 15.4%-ს შეადგენს.
