საგარეო ვაჭრობა: საქსტატის წინასწარი მონაცემებით, 2025 წლის თებერვალში საქონლის ექსპორტი წლიურად 7.1%-ით შემცირდა და 431.5 მლნ აშშ დოლარი შეადგინა, წინა თვეში დაფიქსირებული წლიური 19.3%-იანი ზრდის შემდეგ. ასევე, იმპორტი წლიურად 6.9%-ით შემცირდა 1.1 მლრდ აშშ დოლარამდე, წინა თვის 47.8%-იანი ზრდის შემდეგ. შედეგად, თებერვალში სავაჭრო დეფიციტი წლიურად 6.8%-ით შემცირდა 668.3 მლნ აშშ დოლარამდე.
ჯამურად, 2025 წლის იანვარ-თებერვალში, სავაჭრო დეფიციტი წლიურად 27.9%-ით გაიზარდა და 1.9 მლრდ აშშ დოლარი შეადგინა, რადგან ექსპორტი 4.0%-ით გაიზარდა 835.4 მლნ აშშ დოლარამდე, ხოლო იმპორტი 19.5%-ით გაიზარდა და 2.7 მლრდ აშშ დოლარს გაუტოლდა.
მონეტარული პოლიტიკა: სებ-ის მონეტარული პოლიტიკის კომიტეტმა 2025 წლის 12 მარტს რეფინანსირების განაკვეთი უცვლელად 8.0%-ზე დატოვა. აღნიშნულ გადაწყვეტილებაზე გავლენა იქონია იანვრის მაღალმა ეკონომიკურმა ზრდამ, თებერვალში ინფლაციის ზრდამ და გაზრდილმა გლობალურმა გაურკვევლობამ, რომელიც სატარიფო პოლიტიკას უკავშირდება. სებ-ის პროგნოზით, ინფლაცია ეტაპობრივად მიზნობრივ მაჩვენებელს დაუახლოვდება 1H25-ში, შემდგომ მიზნობრივ მაჩვენებელს დროებით გადააჭარბებს და საშუალოვადიან პერიოდში 3.0%-ის გარშემო დასტაბილურდება. ამასთან, მონეტარული პოლიტიკის განაკვეთის შემდგომი ცვლილება დამოკიდებული იქნება განახლებულ მაკროეკონომიკურ საპროგნოზო სცენარებსა და რისკების ანალიზზე, რეგულატორის მიხედვით. მონეტარული პოლიტიკის კომიტეტის შემდეგი სხდომა 2025 წლის 7 მაისს ჩატარდება.
პირდაპირი უცხოური ინვესტიციები: საქსტატის წინასწარი მონაცემებით, 2024 წლის მე-4 კვარტალში საქართველოში განხორციელებული პირდაპირი უცხოური ინვესტიციები წლიურად 24.4%-ით გაიზარდა 367.5 მლნ აშშ დოლარამდე, წინა კვარტალში დაფიქსირებული წლიური 55.2%-იანი კლების შემდეგ. აღნიშნული ზრდა სავალო ვალდებულებების დაფარვის წლიურად 214.7 მლნ აშშ დოლარით შემცირებას უკავშირდება. ამასთან, იმავე პრიოდში ადგილი ჰქონდა რეინვესტიციების (-28.1% წ/წ, 291.7 მლნ აშშ დოლარი) და სააქციო კაპიტალის (-14.9% წ/წ, 164.2 მლნ აშშ დოლარი) კომპონენტების შემცირებას.
2024 წლის მე-4 კვარტალში ყველაზე მეტი პირდაპირი უცხოური ინვესტიცია განხორციელდა შემდეგ სექტორებში: საფინანსო (314.9 მლნ აშშ დოლარი, +8.7% წ/წ), უძრავი ქონება (65.8 მლნ აშშ დოლარი, +129.1% წ/წ), დამამუშავებელი მრეწველობა (23.1 მლნ აშშ დოლარი, +205.7% წ/წ), ინფორმაცია და კომუნიკაცია (18.8 მლნ აშშ დოლარი, +132x წ/წ), და ტრანსპორტი (15.6 მლნ აშშ დოლარი, -38.6% წ/წ). ამასთან, მე-4 კვარტალში უცხოური ინვესტიციები შემცირდა ვაჭრობის (-45.8 მლნ აშშ დოლარი) და ენერგეტიკის (-23.8 მლნ აშშ დოლარი) სექტორებში.
მე-4 კვარტალში უმსხვილესი ინვესტორი ქვეყნები იყვნენ დიდი ბრიტანეთი (222.6 მლნ აშშ დოლარი), მალტა (67.9 მლნ აშშ დოლარი) და ნიდერლანდები (36.3 მლნ აშშ დოლარი).
ჯამურად, 2024 წელს პირდაპირი უცხოური ინვესტიციები წლიურად 29.9%-ით შემცირდა და 1.3 მლრდ აშშ დოლარი შეადგინა, რაც მშპ-ის 4.0%-ია.
