ხელფასები: საქსტატის მიხედვით, 2024 წლის მე-3 კვარტალში საშუალო თვიური ნომინალური ხელფასი წლიურად 10.9%-ით გაიზარდა და 2,057 ლარი შეადგინა, წინა კვარტალში დაფიქსირებული წლიური 11.1%-იანი ზრდის შემდეგ. ამასთან, აღნიშნულ პერიოდში, რეალური ხელფასი 9.6%-ით გაიზარდა. სექტორების მიხედვით, 2024 წლის მე-3 კვარტალში ყველაზე მაღალი საშუალო თვიური ხელფასი დაფიქსირდა შემდეგ დარგებში: ინფორმაცია და კომუნიკაცია (3,977 ლარი, +0.5% წ/წ), მშენებლობა (3,198 ლარი, +5.4% წ/წ), ფინანსური და სადაზღვევო საქმიანობა (3,187 ლარი, +13.5% წ/წ) და პროფესიული და სამეცნიერო საქმიანობები (3,063 ლარი, +17.1% წ/წ). ამასთან, აღნიშნულ პერიოდში ყველაზე დაბალი საშუალო თვიური ხელფასი ფიქსირდება განათლების (1,255 ლარი, +20.9% წ/წ), წყალმომარაგების (1,284 ლარი, +11.7% წ/წ) და სოფლის მეურნეობის (1,437 ლარი, +16.5% წ/წ) დარგებში.
მონეტარული პოლიტიკა: სებ-ის მონეტარული პოლიტიკის კომიტეტმა 2024 წლის 18 დეკემბერს რეფინანსირების განაკვეთი უცვლელად 8.0%-ზე დატოვა. აღნიშნულ გადაწყვეტილებაზე ძირითადი ზეგავლენა იქონია ეკონომიკური პერსპექტივის მაღალმა გაურკვევლობამ. სებ-ი აღნიშნავს, რომ როგორც შიდა საყურადღებო ფაქტორებმა, ასევე რეგიონში არსებულმა გეოპოლიტიკურმა დაძაბულობამ შესაძლოა ინფლაციური ზეწოლა წარმოქმნას. დამატებით, სებ-ის მიხედვით, საყურადღებო ხდება საერთაშორისო ბაზრებზე ნავთობისა და სურსათის ფასების მერყეობის ზრდა. მონეტარული პოლიტიკის კომიტეტის შემდეგი სხდომა 2025 წლის 29 იანვარს ჩატარდება.
ფულადი გზავნილები: სებ-ის მიხედვით, 2024 წლის ნოემბერში ფულადი გზავნილები წლიურად 9.6%-ით შემცირდა 266.7 მლნ აშშ დოლარამდე, წინა თვეში დაფიქსირებული წლიური 1.5%-იანი კლების შემდეგ. ძირითადი დონორი ქვეყნებიდან ფულადი გზავნილების მნიშვნელოვანი წლიური ზრდა დაფიქსირდა ევროკავშირიდან (+8.2%, მთლიანის 45.9%), აშშ-დან (+21.6%, მთლიანის 18.8%) და ისრაელიდან (+15.3%, მთლიანის 8.0%). ამასთან, ფულადი გზავნილები წლიურად შემცირდა რუსეთიდან (-60.6%, მთლიანის 11.2%) და ყაზახეთიდან (-56.0%, მთლიანის 3.0%). ჯამურად, 2024 წლის იანვარ-ნოემბერში ფულადი გზავნილები წლიურად 19.8%-ით შემცირდა და 3.1 მლრდ აშშ დოლარი შეადგინა. ჩვენი პროგნოზით, ფულადი გზავნილები 3.4 მლრდ აშშ დოლარის დონეზეა მოსალოდნელი 2024 წელს (4.1 მლრდ აშშ დოლარი იყო 2023 წელს).
მწარმოებელთა ფასების ინდექსი: საქსტატის მონაცემებით, მწარმოებელთა ფასების ინდექსი წლიურად 6.6%-ით გაიზარდა 2024 წლის ნოემბერში, წინა თვეში არსებული 6.8%-იანი ზრდის შემდეგ. მწარმოებელთა ფასების წლიურ ზრდაზე ძირითადი ზეგავლენა იქონია ფასების ზრდამ დამამუშავებელი მრეწველობის (+4.7%), სამთომოპოვებითი მრეწველობის (+23.7%) და ელექტროენერგიის მიწოდების (+10.8%) სექციებში.
