ეკონომიკური ზრდა: საქსტატის წინასწარი მონაცემებით, 2024 წლის ნოემბერში რეალური მშპ-ის ზრდა 7.5%-მდე შენელდა, წინა თვეში დაფიქსირებული 11.0%-იანი ზრდის შემდეგ. ჯამურად, 2024 წლის იანვარ-ნოემბერში საქართველოს ეკონომიკა წლიურად 9.4%-ით გაიზარდა. ნოემბერში ეკონომიკის ზრდა ძირითადად განაპირობა პროფესიული და სამეცნიერო, ინფორმაცია და კომუნიკაციის, და ტრანსპორტის დარგებმა. ამასთან, კლება დაფიქსირდა დამამუშავებელი მრეწველობის დარგში. ნოემბრის მოსალოდნელზე დაბალი ფაქტიური ეკონომიკური ზრდის გათვალისწინებით, 2024 წლის ეკონომიკური ზრდის პროგნოზი 9.4%-მდე შევამცირეთ, წინა 9.7%-დან (იხილეთ განახლებული მაკრო მიმოხილვა აქ).
ინფლაცია: 2024 წლის დეკემბერში წლიური ინფლაცია 1.9%-მდე გაიზარდა, წინა თვეში დაფიქსირებული 1.3%-იანი ინფლაციის შემდეგ. ინფლაციის ზრდა ძირითადად განაპირობა შერეული საქონლის ფასების წლიური ზრდის 3.9%-მდე დაჩქარებამ (+3.1% წ/წ წინა თვეში) და ადგილობრივი ინფლაციის წლიურმა ზრდამ 2.2%-მდე (+1.8% წ/წ წინა თვეში). ამასთან, იმპორტირებული წლიური ინფლაცია შემცირდა და -0.9% შეადგინა (-1.7% წ/წ წინა თვეში). რაც შეეხება საბაზო ინფლაციას, რომელიც კალათიდან გამორიცხავს სურსათის, ენერგომატარებლების და თამბაქოს ფასებს, ნოემბერში 2.3%-მდე გაიზარდა წინა თვის 1.6%-იანი დონიდან.
სასაქონლო ჯგუფების მიხედვით, 2024 წლის დეკემბერში წლიური ინფლაციის ფორმირებაზე მნიშვნელოვანი გავლენა იქონია ფასების ცვლილებამ შემდეგ ჯგუფებში: სურსათი და უალკოჰოლო სასმელები (+3.6% წ/წ, +1.18პპ), ალკოჰოლური სასმელები, თამბაქო (+5.9%, +0.40პპ), ჯანდაცვა (+3.7% წ/წ, +0.35პპ), სასტუმროები და რესტორნები (+7.7%, +0.27პპ), განათლება (+5.1% წ/წ, +0.26პპ), ტრანსპორტი (-1.4% წ/წ, -0.18პპ), კომუნალურები (-3.2% წ/წ, -0.27პპ) და კავშირგაბმულობა (-12.7% წ/წ, -0.47პპ). ამასთან, თვიურ ჭრილში დეკემბერში 0.7%-იანი ინფლაცია დაფიქსირდა, რომელიც ძირითადად სურსათი და უალკოჰოლო სასმელების (+1.3% თ/თ, +0.46პპ) ჯგუფში ფასების ზრდამ განაპირობა.
ამასთან, საშუალო წლიურმა ინფლაციამ 1.1% შეადგინა 2024 წელს (2.5% იყო 2023 წელს).
მიმდინარე ანგარიში: 2024 წლის მე-3 კვარტალში მიმდინარე ანგარიშის დადებითმა ბალანსმა 61.4 მლნ აშშ დოლარი შეადგინა, რაც მშპ-ის 0.7% ია. მიმდინარე ანგარიშის გაუმჯობესება ძირითადად მომსახურების ბალანსის წლიური 14.2%-ით ზრდამ და საქონლის სავაჭრო დეფიციტის 6.9%-ით შემცირებამ განაპირობა. ჯამურად, 2024 წლის იანვარ-სექტემბერში მიმდინარე ანგარიშის დეფიციტი წლიურად 19.1%-ით 866.1 მლნ აშშ დოლარამდე შემცირდა და მშპ-ის 3.5% შეადგინა (4.8% იყო 2023 წლის იანვარ-სეექტემბერში). ამასთან, თუ მიმდინარე ანგარიშიდან რეინვესტიციებს გამოვრიცხავთ (აღირიცხება როგორც მიმდინარე ანგარიშის, ისე მისი დაფინანსების წყაროს მუხლებში), მაშინ ბალანსი დადებითია 2024 წლის იანვარ-სექტემბერში და მშპ-ის 0.1%-ს შეადგენს (0.5%-იანი დადებითი ბალანსი იყო 2023 წლის იანვარ-სექტემბერშიც). ჩვენი პროგნოზით, მიმდინარე ანგარიშის დეფიციტი მშპ-ის 4.9%-ის დონეზეა მოსალოდნელი 2024 წელს, რაც გაუმჯობესებაა 2023 წლის 5.6%-დან.
