ელექტროენერგიის მიწოდება: 2024 წელს მიწოდებამ 15.5 ტვტ.სთ შეადგინა. აქედან 14.2 ტვტ.სთ ადგილობრივი გენერაცია (- 1.1% წ/წ), ხოლო 1.2 ტვტ.სთ (+55.4% წ/წ) იმპორტი იყო. აღსანიშნავია, რომ 2024 წელს ექსპლუატაციაში შევიდა 44.5 მგვტ-იანი ხობი-2 ჰიდროელექტროსადგური და ორი მცირე ზომის ჰესი (2.7 მგვტ ჯამური სიმძლავრით).
ადგილობრივი მოხმარება: 2024 წელს ელექტროენერგიის ადგილობრივი მოხმარება წლიურად 6.0%-ით გაიზარდა და 13.8 ტვტ.სთ შეადგინა. ამასთან, განსაკუთრებით მაღალი ტემპით (+14.1% წ/წ) გაიზარდა პირდაპირი მომხმარებლების ელექტოენერგიის მოხმარება, რაც ძირითადად კრიპტო-მაინინგ და მეტალურგიის სექტორების აქტივობით აიხსნება.
ექსპორტი: 2024 წელს ექსპორტის მოცულობა შემცირდა 1.0 ტვტ.სთ-მდე (-28.7% წ/წ), ხოლო საშუალო საექსპორტო ფასი კვტ.სთ-ზე 4.7 აშშ ცენტამდე (-27.9% წ/წ). შედეგად ექსპორტიდან შემოსავლები განახევრდა 49.2 მლნ. აშშ დოლარამდე.
სავაჭრო ბალანსი: 2024 წელს საქართველო კვლავ წმინდა ექსპორტიორი იყო 25.7 მლნ აშშ დოლარის ღირებულების წმინდა ექსპორტით. ამასთან, რაოდენობრივად საქართველო წმინდა იმპორტიორი იყო 0.2 ტვტ.სთ წმინდა იმპორტით.
ელექტროენერგიის ფასი საქართველოში: საბითუმო ბაზარზე ელექტროენერგიის ფასი წლიურად 5.9%-ით გაიზარდა და 5.6 აშშ ცენტი შეადგინა. საბალანსო ელექტროენერგიის ფორმირებაში ყველაზე მაღალი წილი კვლავ PPA-იან სადგურებს უჭირავთ. დღით ადრე ბაზარზე ტრანზაქციების რაოდენობა მინიმალური იყო.
ენერგო-პრო ჯორჯიას ქსელში ნეტო აღრიცხვისთვის განსაზღვრული ლიმიტი შეივსო და ახალი განაცხადის მიღება შეჩერებულია, ხოლო თელასის ქსელში განაცხადების მიღება გრძელდება. ნეტო აღრიცხვის რეგულაციით მოსარგებლე მიკრო სიმძლავრის ელექტროსადგურებს 49.4 მგვტ-იანი ზრდა ჰქონდათ 2024 წელს. შედეგად, წლის ბოლოს, ნეტო აღრიცხვის რეგულაციით სარგებლობდა 1,620 მიკრო სიმძლავრის ელექტროსადგური, 117.0 მგვტ ჯამური დადგმული სიმძლავრით.
