2025 წლის პირველ კვარტალში:
ნავთობის ფასი თითქმის უცვლელი (+0.1%) იყო და ერთ ბარელზე $74.7 შეადგინა. მიუხედავად ამისა, კვარტლის განმავლობაში (და აპრილის პირველ დღეებში) ბაზარზე ფასების მნიშვნელოვანი მერყეობა დაფიქსირდა. ახლო აღმოსავლეთის კონფლიქტი და OPEC-ის გადაწყვეტილებები კვლავ მნიშვნელოვან როლს ასრულებდნენ, დამატებით კი ბაზარზე ახალი ფაქტორი გაჩნდა ტრამპის ადმინისტრაციის სახით.
ბუნებრივი აირის ფასი 15.4%-ით შემცირდა. მიუხედავად კვარტალური ვარდნისა, 2025 წელი გარკვეული ვოლატილობით დაიწყო, რაც გამოწვეული იყო უკრაინა-რუსეთის სატრანზიტო შეთანხმების შეწყვეტით და ცივი ამინდით.
ოქროს ფასი 19.0%-ით გაიზარდა. ძვირფასი ლითონი ახალი რეკორდების დამყარებას 2025 წელსაც განაგრძობს, რაც იმავე ფაქტორებითაა გამოწვეული, რაც მას ბოლო სამი წლის განმავლობაში ეხმარება – ცენტრალური ბანკები და რისკების ჰეჯირება.
ამონიუმის ნიტრატის ფასი 3.9%-ით გაიზარდა. ფასების დინამიკა მნიშვნელოვნად არის დაკავშირებული ბუნებრივი აირის ბაზართან (აზოტოვანი სასუქების წარმოების ძირითადი კომპონენტი), თუმცა გარკვეული ჩამორჩენის ეფექტით.
ხორბლის ფასი 7.4%-ით გაიზარდა. ბაზარი კვლავ მგრძნობიარე იყო ამინდის ცვლილებებისა და მიწოდების პოტენციური შეფერხებების მიმართ.
სპილენძის ფასი 11.6%-ით გაიზარდა. კვარტლის განმავლობაში ტრეიდერები მეტალის ლონდონიდან ნიუ-იორკში გადატანას ჩქარობდნენ ტარიფების მოლოდინში.
ფეროსილიკონი – ევროპული ფეროსილიკონის ფასი 8.5%-ით გაიზარდა, ხოლო ჩინური 4.1%-ით შემცირდა.
